KRAL BEYNƏLXALQ ƏLAQƏLƏR İNSTİTUTUNDA SİYASİ BRİFİNQ
Azərbaycan Prezidenti İlham Əliyevi institutun baş direktoru Klod Mission və digər rəsmi şəxslər böyük hörmət və ehtiramla qarşıladılar.
“Avropa İttifaqı-Azərbaycan: enerji sahəsində və digər sahələrdə əməkdaşlıq” mövzusuna həsr olunmuş diskussiyada bir sıra ölkələrin Brüsseldə akkreditə olunmuş səfirləri, beynəlxalq təşkilatlar yanında daimi nümayəndələri, Belçikanın tanınmış elm xadimləri, nüfuzlu siyasətçilər, politoloqlar, beynəlxalq təşkilatların, o cümlədən Avropa İttifaqı Şurasının, Avropa Parlamentinin təmsilçiləri iştirak edirdilər.
İnstitutun baş direktoru KLOD MİSSİON brifinqi açaraq dedi:
- Zati-aliləri!
Xanımlar və cənablar!
Mən Azərbaycan Prezidenti cənab İlham Əliyevi Kral Beynəlxalq Əlaqələr İnstitutunda salamlamaqdan məmnunam və şərəf hissi duyuram. Auditoriyamız qarşısında çıxış etmək üçün dəvətimizi qəbul etdiyinizə görə minnətdarlığımı bildirirəm. Bilirik ki, Siz ölkəmizə bir neçə günlüyə gəlmisiniz və vaxt tapıb burada bizimlə görüşdüyünüzə görə öz səmimi təşəkkürümüzü ifadə edirik. Bu görüşdə sədrlik etməyə razılığını vermiş Belçika Xarici İşlər Nazirliyinin çoxtərəfli münasibətlər üzrə direktoru səfir Jan de Buta minnətdarıq. İndi isə mən böyük məmnuniyyət hissi ilə Sizi bu diskussiyanı dinləməyə dəvət edirəm və sözü cənab sədrə verirəm.
X X X
Belçika Xarici İşlər Nazirliyinin çoxtərəfli münasibətlər üzrə direktoru sədr JAN DE BUT çıxış edərək dedi:
- Çox sağ olun! Bu cür mötəbər auditoriyada sədrlik etmək üçün məni dəvət etdiyinizə görə minnətdaram.
Zati-aliləri cənab Prezident!
Xanımlar və cənablar!
Bu axşam burada olmaq mənim üçün böyük şərəfdir. Mən Azərbaycan Respublikasının Prezidenti cənab İlham Əliyevi sizə təqdim etmək istərdim.
Zati-aliləri, biz bu cür gənc yaşında belə böyük təcrübəyə malik olan şəxsiyyəti görməkdən çox şadıq. Siz, akademik biznes, eləcə də hökumət işində və siyasət sahəsində olduqca fəal olmusunuz. Hazırda isə Siz, dövlət başçısısınız. Tarix elmləri namizədi elmi dərəcəsini çox gənc yaşlarınızda, hətta 24 yaşınız tamam olmamış almısınız, siyasi elmlər sahəsində doktorluq dərəcəsinə maliksiniz. Siz, Moskva Beynəlxalq Münasibətlər İnstitutunda mühazirə oxumusunuz.
Siyasətə gəldikdə, Siz, Yeni Azərbaycan Partiyasının sədr müavini, daha sonra sədrin birinci müavini və nəhayət 2005-ci ildə sədr seçilmisiniz. Parlament fəaliyyətinə gəldikdə, Siz iki dəfə Azərbaycan parlamentinə seçilmisiniz. Eyni zamanda, Avropa Şurası Parlament Assambleyasında ölkənizin parlament nümayəndə heyətinin rəhbəri və Assambleya sədrinin müavini olmusunuz.
Biznes sahəsində 1991-1994-cü illər ərzində bir sıra özəl sənaye, kommersiya şirkətlərinə rəhbərlik etmisiniz. Daha sonra Siz Azərbaycan Respublikası Dövlət Neft Şirkətinin vitse-prezidenti və birinci vitse-prezidenti vəzifəsində işləmisiniz.
2003-cü ilin avqust ayındakı Baş nazir vəzifəsinə təyin olunmusunuz. Həmin ilin oktyabr ayında isə Siz ölkənizin Prezidenti seçilmisiniz.
Xanımlar və cənablar! Bu gün maraqlı tərcümeyi-halına malik olan şəxsiyyətlə görüşmək və onun “Avropa İttifaqı-Azərbaycan: enerji sahəsində və digər sahələrdə əməkdaşlıq” mövzusunda çıxışını dinləməkdən məmnunuq.
Beləliklə, Zati-aliləri cənab Prezident, biz hamımız Sizi dinləyirik!
X X X
Prezident İlham Əliyev siyasi brifinqdə çıxış etdi.
Bölmənin digər xəbərləri
