KSANİ ÇAYI AZƏRBAYCANLILAR YAŞAYAN KƏNDƏ ZİYAN VURMUŞDUR
AZƏRTAC-ın xüsusi müxbiri xəbər verir ki, Gürcüstanın Kaspi rayonunda azərbaycanlılar yaşayan Ferma kəndinin sakinləri aprelin 26-na keçən gecəni açıq səma altında keçirmişlər. Ksani çayında suyun səviyyəsinin qəflətən qalxması kənd camaatı üçün ciddi təhlükə yaratmış, əkin sahələrini su basmışdır.
Kənd sakinləri hökumətdən zərər çəkən ailələrə yardım göstərməyi və daşqının nəticələrinin aradan qaldırılması üçün tədbirlər görməyi xahiş etmişdir.
Xatırladaq ki, keçən ilin yazında da daşqın bu kəndə böyük ziyan vurmuş, bir neçə evi uçurmuşdu.
