LƏNKƏRAN RAYONUNUN KOSALAR KƏNDİNDƏ IX-XII ƏSRLƏRƏ AİD DAŞ ABİDƏ AŞKAR EDİLMİŞDİR
Lənkəran, 2 oktyabr (AZƏRTAC). Lənkəran rayonunun Kosalar kəndində Mivo adlanan ərazidən IX-XII əsrlərə aid daş abidə aşkar edilmişdir.
AZƏRTAC xəbər verir ki, kənd sakini Cavanşir Həsənzadə həyətyanı sahədə qazıntı apararkən qədim sənət nümunəsi ilə rastlaşmışdır. Daş abidənin üzərində başında tac və od püskürən şir əks olunmuşdur. Üzərində müxtəlif işarələr olan abidənin hündürlüyü təxminən 80, eni isə 60 santimetrdir. Abidənin aşkar olunduğu ərazidə 2 hektara yaxın sahə kərpiclə hasara alınmışdır.
Abidə əhəng daşındandır. Şirin bədənini ulduz təsvirləri bəzəyir. Diqqətlə baxdıqda ulduzlar şir bürcünü xatırladır.
Kosalar kəndindəki Mivo adlanan ərazinin tarixi təxminən IX-X əsrlərə təsadüf edir. Ehtimal edilir ki, daş abidənin də yaşı elə bu qədərdir.
Yerli sakinlər bildirirlər ki, Kosalar kəndində hələ 1986-cı ildə tunellər aşkar edilmişdir. Kənddə bir neçə küp qəbir də tapılmışdır. O zaman burada xeyli miqdarda maddi-mədəniyyət nümunələri aşkar olunsa da, ərazi mühafizə olunmamış, əkin üçün istifadə edilmişdir.
Bütün bunlar onu gostərir ki, aşkar edilən daş abidənin, o cümlədən Lənkəranın Kosalar kəndinin tarixinin ciddi tədqiqata ehtiyacı vardır.
######
Bölmənin digər xəbərləri
