LƏNKƏRANDA EV QUŞLARININ TƏLƏFATININ SƏBƏBİ ARAŞDIRILIR
Kənd Təsərrüfatı Nazirliyi yanında Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, bəzi kütləvi informasiya vasitələrində Lənkəran rayonunun Digah kəndində iki ev quşunun ölümü haqqında məlumatlar yayılmışdır.
Dövlət Baytarlıq Xidmətinin yerli mütəxəssisləri bu informasiyaların yayılmasından əvvəl həmin kənddə olmuş, həyətə baxış keçirmiş, quşlara antibiotik verilmiş və xəstəliyin qarşısı alınmışdır.
Bundan əlavə, ilkin diaqnozu dəqiqləşdirmək üçün mütəxəssislər ölmüş quşlardan nümunələr götürərək zona və Respublika Baytarlıq laboratoriyalarına göndərmişlər. İlkin müayinələr ölmüş quşlarda kolibakterioz xəstəliyinin törədicisini aşkar etmişdir.
Kənd Təsərrüfatı Nazirliyi yanında Dövlət Baytarlıq Xidməti əhalinin nəzərinə çatdırır ki, çöl və ya ev quşlarının tələfatı barədə yerli dövlət baytarlıq idarələrinə məlumat verməyi unutmasınlar. Bununla əlaqədar həm də 563-41-57 nömrəli telefonla xidmətin “qaynar xətt”inə müraciət etmək olar.
Bölmənin digər xəbərləri
