İQTİSADİYYAT
Lənkəranın sosial-iqtisadi inkişafında özəl sektorun rolu əhəmiyyətli dərəcədə artmışdır
![Lənkəranın sosial-iqtisadi inkişafında özəl sektorun rolu əhəmiyyətli dərəcədə artmışdır](/files/2013/3/1200x630/14071450603028253899_1200x630.jpg)
Lənkəran, 23 oktyabr (AZƏRTAC). Lənkəran şəhərindəki Heydər Əliyev Mərkəzində keçirilən yığıncaqda sosial-iqtisadi inkişafın doqquz aylıq yekunları və qarşıda duran vəzifələr müzakirə edilmişdir.
AZƏRTAC xəbər verir ki, yığıncaqda ölkə iqtisadiyyatının davamlı inkişafının Lənkəran rayonunun sosial-iqtisadi tərəqqisinə müsbət təsirindən söhbət açılmış, bütün sahələr üzrə yüksək nəticələr əldə olunduğu vurğulanmışdır. Belə ki, 2013-cü ilin doqquz ayında rayonda ümumi məhsul istehsalı 21,3 faiz artaraq 282,5 milyon manata çatmışdır. Sahibkarlığın inkişafına dövlət və yerli səviyyədə dəstək nəticəsində özəl sektorun payı sənayedə 71 faiz, aqrar bölmədə 99,9 faiz və pullu xidmətlərdə 82,4 faiz təşkil etmişdir. Həmin müddətdə rayonda 1903 yeni iş yeri açılmışdır ki, bunun da 1539-u daimi iş yerləridir.
Yığıncaqda aqrar sahədə qazanılmış uğurlardan da bəhs olunmuş və bildirilmişdir ki, hesabat dövründə 95 milyon manatlıq kənd təsərrüfatı məhsulu istehsal edilmişdir. Rayon fermerləri bu mövsümdə 125 min ton tərəvəz, 3 min 380 ton taxıl, 5 min 256 ton kartof, 6 min 509 ton meyvə, 99,5 ton yaşıl çay yarpağı tədarük etmişlər. Ötən ilin müvafiq dövrü ilə müqayisədə tərəvəz istehsalı 90 ton, meyvə istehsalı 170 ton, taxıl istehsalı 64,2 ton artmışdır. Həmçinin diri çəkidə 4 min 282 ton ət, 22 min 696 ton süd və 11,9 milyon ədəd yumurta əldə olunmuşdur.
Bildirilmişdir ki, cari ilin doqquz ayı ərzində rayonda genişmiqyaslı quruculuq-abadlıq işləri davam etdirilmişdir. Lənkəran şəhərinin Şəhidlər Xiyabanı küçəsi tamamilə yenidən qurulmuş və dördzolaqlı yol istifadəyə verilmişdir. Küçədəki körpü genişləndirilmiş, müasir işıqlandırma sistemi quraşdırılmışdır. Şəhərdaxili küçələrə 48,5 min kvadratmetr asfalt döşənmiş, Sütəmurdov kənd yolunun 3,1 kilometri asfaltlaşdırılmışdır. Həmçinin evləri qəzalı vəziyyətə düşmüş ailələr üçün 24 mənzilli yaşayış binası tikilib istifadəyə verilmişdir.
Diqqətə çatdırılmışdır ki, 9 ayda rayonun 33 kəndinə təbii qazın verilməsi təmin edilmişdir. Yaxın aylarda daha 8 kənd və qəsəbə qazlaşdırılacaq və bununla da rayondakı yaşayış məntəqələrinin 85 faizi təbii qaz alacaqdır. Hazırda Lənkəran şəhərində su və kanalizasiya sistemi yenidən qurulur. Smeta dəyəri 210 milyon manat olan bu böyük layihənin reallaşdırılması nəticəsində şəhər və rayon əhalisi dünya standartlarına uyğun təmiz içməli su ilə təchiz olunacaqdır.
Rayonda təhsilin maddi-texniki bazasının gücləndirilməsi üçün də ardıcıl iş aparılır. Yeni dərs ilinin əvvəlində Vilvan kəndində 640 şagird yerlik yeni orta məktəb binası, şəhər 5 saylı uşaq bağçası üçün 110 yerlik bina tikilib istifadəyə verilmişdir. Hazırda Bəliton və Darquba kənd tam orta məktəbləri üçün hər biri 220 şagird yerlik binaların tikintisi davam etdirilir. Şəhərdəki 2 saylı orta məktəb binasının əsaslı təmiri başa çatmaq üzrədir.
Azərbaycan Prezidentinin müvafiq Sərəncamına əsasən ayrılmış vəsait hesabına Mərkəzi Rayon Xəstəxanası əsaslı şəkildə təmir edilmiş, Lənkəran şəhərində rayonlararası narkoloji xəstəxana üçün 18 çarpayılıq yeni bina tikilmişdir.
Yığıncaqda bu ilin doqquz ayında rayonda sosial-iqtisadi inkişaf sahəsində qazanılmış uğurlarla yanaşı, işdə yol verilmiş nöqsanlardan da söhbət açılmış, mövcud problemlərin həlli yolları araşdırılmışdır.
Sonda müzakirə edilən məsələ ilə bağlı müvafiq qərar qəbul edilmişdir.