LEONİD KUÇMA PREZİDENTLİK MÜDDƏTİNİ UZATMAQ NİYYƏTİNDƏ DEYİLDİR
AZƏRTAC-ın müxbiri Kiyevdən xəbər verir ki, Ukrayna Prezidenti iyulun 10-da bir daha təsdiq etmişdir ki, 2004-cü ilin payızında başa çatacaq prezident səlahiyyətlərinin müddətini uzatmaq niyyətində deyildir. Dövlət başçısı “prezident seçkilərinin aşkarlıq şəraitində və konstitusiyaya uyğun keçirilməsinə” tərəfdar olduğunu bildirmişdir. Leonid Kuçma onun təklif etdiyi konstitusiya islahatları ətrafında saxtakarlığa son qoymağa və “prezidentin guya öz səlahiyyətlərini uzatmaq istəməsi barədə şübhələrdən” əl çəkməyə cağırmışdır. O vurğulamışdır ki, konstitusiyada dəyişikliklər barədə prezidentin təklif etdiyi qanun layihəsində dövlət başçısının səlahiyyət müddətinin uzaldılması nəzərdə tutulmamışdır. Prezidentin təklifinə görə, dövlət başçısının, parlamentin və yerli idarəetmə orqanlarının seçkiləri bir il ərzində keçirilməlidir. Seçkilərin keçirilməsi vaxtını parlament müəyyən etməlidir.
Bölmənin digər xəbərləri
