LİTVADA BASKETBOLÇU, ÇİNDƏ İKİ MARAFONÇU YARIŞ ZAMANI ÖLMÜŞDÜR

19.10.2004 [14:47]
Çap et
A⁺ A^-

AZƏRTAC-ın xarici informasiya agentliklərindən aldığı xəbərə görə, oktyabrın 18-də Litvanın “Atletas” basketbol komandasının 34 yaşlı müdafiəçisi Tauras Stumbris oyun zamanı keçinmişdir. Məşhur “Jalgiris” klubu ilə “Atletas” komandası arasında görüş ikinci hissədə dayandırılmışdır. Çünki bu zaman Stumbris gözlənilmədən özünü pis hiss edərək, huşunu itirmişdir.

Təcili tibbi yardım maşını gələnədək hər iki komandanın həkimləri basketbolçuya süni nəfəs verərək və ürəyinə masaj edərək, onu həyata qaytarmağa çalışmışlar. Lakin özünü yetirən həkimlər də idmançını ölümdən xilas edə bilməmişlər.

Çində isə paytaxt Pekində oktyabrın 17-də 25 min adamın iştirakı ilə keçirilən ənənəvi beynəlxalq marafon yürüşü zamanı iki iştirakçı finişə çatmamış ölmüşdür. 20 yaşlı tələbə Lüy Hunbin məsafənin 17-ci kilometrində huşunu itirmişdir. Onu dərhal xəstəxanaya aparmışlar. Burada həkimlərin səyləri bir nəticə verməmiş və o, canını tapşırmışdır.

Aradan bir az keçmiş marafon yürüşünün təşkilatçılarından daha bir qara xəbər gəlmişdir. Hu soyadlı pensiyaçı da gərginliyə dözməyərək ölmüşdür. Pekin Universitetindən olan bir qadın iştirakçı isə paytaxt xəstəxanalarından birində ağır vəziyyətdədir.

Ümumiyyətlə, builki marafon yarışı zamanı 11 iştirakçını xəstəxanaya aparmaq lazım gəlmişdir.