MACARISTANDA PARLAMENT SEÇKİLƏRİNİN İKİNCİ TURU KEÇİRİLƏCƏK
Ərazi siyahıları üzrə bülletenlər hesablandıqdan sonra Baş nazir Ferents Dürçanın Sosialist Partiyasının səslərin 43 faizindən çoxunu topladığı məlum olmuşdur. Müşahidəçilərin fikrincə, sosialistlər seçkilərdə qazandıqları üstünlüyə görə, əsasən, Nazirlər Kabinetinin 44 yaşlı başçısına – uğurlu biznesmenə, çoxuşaqlı ataya borcludurlar. O, seçkiqabağı kampaniya gedişində vətəndaşların sosial müdafiəsini təmin etməklə iqtisadiyyatı liberallaşdırmağa söz vermişdir.
Sosialistlərin əsas rəqibi sayılan Macarıstan Vətəndaş İttifaqı (FİDES) mühafizəkar bloku 42 faizdən bir qədər çox səs toplamışdır.
Daha iki kiçik partiya – Azad Demokratlar İttifaqı və Macarıstan Demokratik Forumu da birpalatalı parlamentdə təmsil oluna bilər.
Səsvermə partiya (ərazi) siyahıları, habelə birmandatlı dairələr üzrə keçirilmişdir. Parlamentə cəmi 386 deputat seçilmişdir. Lakin bəzi birmandatlı dairələrdə qaliblər müəyyənləşdirilmədiyi üçün aprelin 23-də seçkilərin ikinci dövrəsi keçiriləcəkdir. Parlamentdə qüvvələr nisbəti onun nəticələrindən asılı olacaqdır.
Xatırladaq ki, Azərbaycan MSK-nın sədri Məzahir Pənahov da beynəlxalq müşahidəçi kimi seçkiləri izləmişdir. O demişdir ki, seçkilər şəffaf, azad və demokratik şəraitdə, yüksək Avropa standartlarına uyğun keçirilmişdir.
Bölmənin digər xəbərləri
