Malayziya polisi “Al Jazeera” telekanalının nümayəndəliyində axtarış aparıb
Tokio, 4 avqust, AZƏRTAC
Malayziya polisinin əməkdaşları Rabitə və Multimedia Komissiyasının təmsilçiləri ilə birlikdə avqustun 4-də “Al Jazeera” telekanalının bu ölkədəki nümayəndəliyinin ofisində axtarış apararaq, buradakı avadanlığı və sənədləri müsadirə ediblər.
AZƏRTAC xəbər verir ki, bu barədə “New Straits Times” qəzeti hüquq-mühafizə orqanlarının cinayət axtarışı idarəsinə istinadla məlumat yayıb.
Telekanalın əməkdaşlarının axtarışı günün birinci yarısında həyata keçirilib. Kuala-Lumpurun yaxınlığındakı ofisdə axtarış zamanı telekanalın bütün sənədləri götürülüb. Bundan əlavə, kompüterlər və digər elektron avadanlıq da müsadirə olunub.
Qeyd edək ki, Malayziya polisi iyulun əvvəllərindən başlayaraq, “Al Jazeera” telekanalının nümayəndəliyinin fəaliyyətini araşdırmağa başlayıb. Buna əsas kimi qeyri-leqal miqrantların həyatı, pandemiya dövründə qarşılaşdıqları çətinliklər və hökumətin buna reaksiyası barədə 25 dəqiqəlik filmin nümayişi göstərilir.
Malayziyanın Böyük və Müdafiə naziri İsmail Sabri Yakob “Al Jazeera”nı əsassız informasiya yaymaqda ittiham edərək və telekanalın üzr istəməsini tələb edib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
