MASALLIDA VƏRƏM ƏLEYHİNƏ REGİONAL DİSPANSER ƏSASLI TƏMİRDƏN SONRA İSTİFADƏYƏ VERİLMİŞDİR
AZƏRTAC-ın müxbiri xəbər verir ki, mayın 7-də Masallı şəhərindəki vərəm əleyhinə regional dispanser əsaslı təmirdən sonra istifadəyə verilmişdir.
Cənub bölgəsində 1964-cü ildən fəaliyyət göstərən 35 çarpayılıq sağlamlıq ocağının təmiri üçün Səhiyyə Nazirliyi tərəfindən 160 min manat, Qlobal Fond tərəfindən isə 40 min manat vəsait ayrılmışdır.
Tibb müəssisəsi ən müasir rentgen, laboratoriya avadanlığı və tibbi cihazlarla təmin edilmişdir.
Dispanserin açılış mərasimində çıxış edən səhiyyə nazirinin müavini Elsevər Ağayev, ümummilli liderimiz Heydər Əliyevin anadan olmasının 85 illiyi ərəfəsində şəfa ocağının istifadəyə verilməsini dövlətimizin başçısının səhiyyə işçilərinə və adamların sağlamlığına göstərdiyi qayğının təzahürü kimi qiymətləndirmişdir.
2008-ci ildə respublikamızda yeni səhiyyə müəssisələrinin tikintisi üçün dövlət büdcəsindən 94 milyon manat vəsaitin ayrıldığını vurğulayan E.Ağayev, böyük öndərimizin anadan olmasının 85 illiyi ərəfəsində 10-dan artıq tibb ocağının istifadəyə verildiyini diqqətə çatdırmışdır.
Masallı Rayon İcra Hakimiyyətinin başçısı Qəzənfər Ağayev və səhiyyə nazirinin müavini Elsevər Ağayev vərəm dispanserinin açılışını bildirən rəmzi qırmızı lenti kəsdikdən sonra burada yaradılan şəraitlə tanış olmuşlar.
Həmin gün səhiyyə nazirinin müavini Elsevər Ağayev Masallı şəhərində inşa edilən akademik Zərifə Əliyeva adına Göz Xəstəlikləri İnstitutunun filialında tikinti işlərinin gedişi ilə maraqlanmışdır.
Bölmənin digər xəbərləri
