Mavrikinin Baş naziri Britaniya ilə olan Çaqos razılaşmasını yenidən rədd edib
London, 25 dekabr, AZƏRTAC
Mavriki Respublikasının Baş naziri Navinçandra Ramqulam Böyük Britaniyanın Çaqos adalarını Mavrikiyə təhvil verməsini nəzərdə tutan razılaşmanı bir daha rədd edib.
AZƏRTAC xəbər verir ki, Mavriki baş nazirinin müavini iki ölkə arasındakı razılaşmanın son mərhələsində Böyük Britaniyanın cüzi bir məbləğ üzərində mübahisə apardığını bildirib. Baş nazir Navinçandra Ramqulam da razılaşmanın bəzi hissələrinə razı olmadığını bəyan edib.
Britaniyanın Baş naziri Kir Starmer Çaqos adalarının suverenliyini Mavrikiyə təhvil verməyi nəzərdə tutan, lakin Dieqo Qarsiya adasındakı strateji əhəmiyyətli Böyük Britaniya-ABŞ hərbi bazasının icarəyə götürülməsini ehtiva edən razılaşmanı N. Ramqulamın sələfi ilə müzakirə etmişdi.
Lakin hakimiyyətə gəldikdən sonra N. Ramqulam bildirib ki, bu razılaşma ölkənin gözlədiyi faydaları təmin edə bilməz və onu təsdiqləməyəcəyini vurğulayıb. O qeyd edib ki, Mavriki hökuməti Böyük Britaniyaya öz təkliflərini təqdim edib və indi Britaniya öz əks-təklifləri ilə cavab verib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
