MAYIN 8-DƏ ÜMUMDÜNYA QIZIL XAÇ VƏ QIZIL AYPARA GÜNÜ QEYD EDİLƏCƏKDİR
Bu gün 1828-ci il may ayının 8-də anadan olmuş İsveçrə vətəndaşı, humanist ictimai xadim, Nobel sülh mükafatı laureatı Anri Dünanın şərəfinə təsis edilmişdir və 1953-cü ildən bəri qeyd olunur. Anri Düna 1859-cu ildə İtaliyanın Solferino əyalətində Avstriya və Fransa orduları arasında baş vermiş döyüşün şahidi olmuş və müharibənin dəhşətlərini öz gözləri ilə gördükdə, yerli əhalini yardım üçün səfərbər etmişdir. 1863-cü ildə Anri Dünanın təşəbbüsü ilə yaralılara yardım göstərən Beynəlxalq Komitə (gələcək Beynəlxalq Qırmızı Xaç Komitəsi) yaradılmışdır. Qızıl Xaç Hərəkatı məhz bu cür yaranmışdır.
1864-cü il avqust ayının 22-də İsveçrədə keçirilən Diplomatik Konfrans zamanı “Döyüşən silahlı qüvvələrdə yaralıların və xəstələrin vəziyyətinin yaxşılaşdırılması haqqında” Konvensiya imzalanmışdır. Bundan əlavə, Konfransda emblem – ağ fonda qırmızı xaç qəbul olunmuşdur. Belə fərqləndirici nişan, qırmızı fonda ağ xaçı əks etdirən İsveçrə dövlətinin bayrağına olan hörmətin əlamətidir. 1876-cı ildə Osmanlı imperiyası rus-türk müharibəsində iştirak edən tibbi işçilərin müdafiəsi üçün Qızıl Aypara emblemini təklif etmişdir. O vaxtdan adı çəkilən emblem ağ fonda qırmızı xaç emblemi ilə yanaşı bərabər hüquqlu nişan kimi qəbul olunub. Hazırda bir sıra ölkələr tərəfindən istifadə edilir.
Beynəlxalq Qızıl Xaç və Qızıl Aypara Hərəkatı tərkibində 183 milli Qızıl Xaç və Qızıl Aypara cəmiyyətlərini, Beynəlxalq Qırmızı Xaç Komitəsi və Beynəlxalq Qızıl Xaç və Qızıl Aypara Cəmiyyətləri Federasiyasını birləşdirir. Beynəlxalq Hərəkatın bütün tərkib hissələri öz fəaliyyətində fundamental prinsipləri - insansevərlik, qərəzsizlik, neytrallıq, müstəqillik, könüllülük, vahidlik və universallıq- rəhbər tutur.
Beynəlxalq Qızıl Xaç və Qızıl Aypara Cəmiyyətləri Federasiyası dünyada ən böyük humanitar təşkilat kimi insanlara heç bir milli və ya irqi fərq qoymadan, dini mənsubiyyəti və ya siyasi əqidəsindən asılı olmayaraq yardım edir.
Azərbaycan Qızıl Aypara Cəmiyyəti bu tarixlə bağlı bir sıra tədbirlərin keçirilməsini planlaşdırmışdır.
