MƏCBURİ KÖÇKÜN UŞAQLAR ARASINDA KEÇİRİLƏN MÜSABİQƏYƏ YEKUN VURULMUŞDUR
AZƏRTAC xəbər verir ki, “Ekson/Mobil” şirkətinin “Həyat” humanitar təşkilatı ilə birgə Bakıdakı 35 məcburi köçkün məktəbi arasında keçirdiyi Azərbaycan dili və ədəbiyyatının öyrənilməsinə həsr olunmuş müsabiqəyə yekun vurulmuşdur. Rəşid Behbudov adına Mahnı Teatrında qaliblərin mükafatlandırılması mərasimində Baş nazirin müavini, Dövlət Qaçqınkomun sədri Əli Həsənov, “Ekson-Azərbaycan” şirkətinin baş meneceri Dru Qudbred, təhsil nazirinin müavini İsgəndər İsgəndərov, Milli Məclisin deputatı Səyyad Aran, Milli Elmlər Akademiyasının müxbir üzvü, Dövlət mükafatı laureatı, professor Afat Qurbanov çıxış edərək, 1 avqust - Azərbaycan dili və əlifbası günü ilə əlaqədar keçirilən müsabiqənin, eləcə də ümummilli liderimiz Heydər Əliyevin dilimizin inkişafına, dair verdiyi fərman və sərəncamların əhəmiyyətindən danışmışlar. Ölkəmizdə məcburi köçkünlərin qayğı və ehtiyaclarının ödənilməsi, xüsusilə uşaqların sağlam ruhda böyüməsi üçün “Ekson/Mobil”in həyata keçirdiyi tədbirlərdən razılıqlarını bildirmişlər.
Müsabiqənin qaliblərinə qiymətli hədiyyələr verilmiş, iştirakçılara şirkətin maliyyəsi ilə nəşr olunmuş kitablar paylanmışdır.
Bölmənin digər xəbərləri
