SİYASƏT
Məcburi köçkün uşaqlar üçün tikilmiş daha bir yeni məktəb binası istifadəyə verilmişdir
Bakı, 11 noyabr (AZƏRTAC). Sabunçu rayonunun Ramana qəsəbəsində müvəqqəti məskunlaşmış məcburi köçkün uşaqlar yeni dərs ilində Nizami Gəncəvi adına Xankəndi şəhər 4 nömrəli tam orta məktəbi üçün tikilmiş yeni binada təhsil alırlar.
Məcburi Köçkünlərin İşləri üzrə Dövlət Komitəsindən AZƏRTAC-a bildirilmişlər ki, məcburi köçkünlərin həyat şəraitinin yaxşılaşdırılması üçün görülən işlər bu kateqoriyadan olan soydaşlarımızın hər zaman Azərbaycan Respublikasının Prezidenti İlham Əliyevin diqqət və qayğısı ilə əhatə olunduğunu göstərir. Məcburi köçkünlərin müvəqqəti yaşayış yerləri və çadırlardan müasir qəsəbələrə köçürülməsi dövlətin bu insanlara göstərdiyi diqqətin əyani təzahürüdür.
Prezident İlham Əliyevin yürütdüyü siyasətin təməl prinsiplərindən olan məcburi köçkünlərin həyat şəraitinin yaxşılaşdırılması ilə bağlı tədbirlərin nəticəsidir ki, ölkədə çadır düşərgələri ləğv edilmiş, bu insanların əksəriyyəti müasir tipli qəsəbələrə köçürülmüşdür. Onların maddi rifahının yaxşılaşdırılması üçün Dövlət proqramları qəbul edilmiş, sosial müavinətlərin artırılması istiqamətində mühüm tədbirlər görülmüşdür.
2003-2013-cü illər ərzində Dövlət Neft Fondundan və digər mənbələrdən ayrılmış vəsaitlər hesabına 37 min ailə və ya 166 min nəfərdən çox məcburi köçkün üçün 2,2 milyon kvadratmetr sahəsi olan 61 qəsəbə salınmış, fərdi evlər inşa edilmiş, 120 məktəb, 6 musiqi məktəbi, 33 uşaq bağçası üçün yeni binalar, 37 tibb müəssisəsi, 34 klub - icma mərkəzi, 28 rabitə evi tikilmişdir. Həmçinin 490,6 kilometr yol, 644 kilometr su, 1059 kilometr elektrik, 310 kilometr qaz, 75,5 kilometr kanalizasiya, 20 kilometr istilik xətləri çəkilmiş, 581 elektrik transformatoru quraşdırılmışdır.
Bütövlükdə isə 2001-2013-cü illər ərzində 2,5 milyon kvadratmetr sahəsi olan, bütün sosial-texniki infrastruktura malik 82 müasir qəsəbə salınmış, 40 min ailənin, yəni 180 min nəfərədək qaçqın və məcburi köçkünün mənzil-məişət şəraiti yaxşılaşdırılmışdır.
Eyni zamanda məcburi köçkünlərin məşğulluğunun artırılması və yoxsulluğun azaldılması istiqamətində də müvafiq tədbirlər həyata keçirilir. Bu məqsədlə son 10 ildə 380 min nəfər əmək qabiliyyətli məcburi köçkündən 161 min nəfəri büdcə təşkilatlarında və digər sahələrdə daimi işlə, 200 min nəfəri isə müvəqqəti işlə təmin olunmuşdur. 2013-cü ildə bir nəfər məcburi köçkünə xərclənən vəsaitin həcmi təxminən 1100 manat təşkil etmişdir ki, bu da dünyanın digər münaqişə zonaları ilə müqayisədə ən yüksək göstəricidir. Bütün bunların nəticəsidir ki, məcburi köçkünlər arasında yoxsulluq həddi son 10 ildə 75 faizdən 15 faizədək azalmışdır.
Respublikanın bir çox yerlərində tikilən yeni məktəb binaları Azərbaycan dövlətinin gələcəyimiz olan uşaqlara, təhsilə yüksək qayğısından xəbər verir. Azərbaycan Prezidentinin 2012-ci il 30 dekabr tarixli Sərəncamına əsasən Sabunçu rayonunun Ramana qəsəbəsində məcburi köçkün uşaqlar üçün tikilmiş 300 şagird yerlik məktəb binasında yaradılan şərait də bunun daha bir təsdiqidir. Haqqında söhbət gedən məktəb binası Məcburi Köçkünlərin Sosial İnkişaf Fondunun sifarişi ilə inşa olunmuşdur. Müasir təlim-tədris avadanlığı ilə təchiz edilmiş bu təhsil ocağında müəllim və şagirdlər üçün hər cür şərait yaradılmışdır. Bütövlükdə bir hektar sahəni əhatə edən məktəbdə sinif otaqları ilə yanaşı, idman zalı, laboratoriya və fənn kabinələri, kompyuter otağı və yeməkxana da fəaliyyət göstərir. Həmçinin bina elektrik, su və müasir istilik sistemi ilə tam təchiz edilmişdir. Məktəbin ətrafında isə idman meydançası tikilmişdir.
Xatırladaq ki, Nizami Gəncəvi adına Xankəndi şəhər 4 nömrəli tam orta məktəbi böyük tarixə malikdir və 1945-ci ildən Azərbaycan məktəbi kimi fəaliyyət göstərərək ölkə təhsilinin inkişafına öz töhfələrini vermiş, Dağlıq Qarabağda azərbaycançılıq ideyalarının, ədəbiyyatımızın, mədəniyyətimizin, adət-ənənələrimizin qorunub saxlanılması və təbliğində, gənc nəsildə yüksək mənəvi dəyərlərin formalaşmasında mühüm rol oynamışdır.
Məktəbin səmərəli fəaliyyətinin təmin edilməsinin və zəngin ənənələrinin qorunub saxlanmasının zəruriliyi nəzərə alınaraq Xankəndi sakinlərinin böyük bir qisminin müvəqqəti məskunlaşdığı Bakı şəhərinin Sabunçu rayonunun Ramana qəsəbəsində Nizami Gəncəvi adına Xankəndi şəhər 4 nömrəli tam orta məktəbi üçün 300 şagird yerlik yeni binanın tikilməsi təqdirəlayiqdir və təhsil ictimaiyyəti tərəfindən yüksək qiymətləndirilir.