MƏCBURİ KÖÇKÜNLƏR ÜÇÜN QƏSƏBƏLƏR TİKİLİR
“Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”na əlavələr edilməsi haqqında Prezident İlham Əliyevin 2007-ci il 31 oktyabr tarixli Sərəncamında nəzərdə tutulmuş tədbirlərin icrasına başlanmışdır. Tədbirlər planına əsasən, məcburi köçkünlər üçün yeni qəsəbələrin tikintisinə başlanmışdır.
AZƏRTAC xəbər verir ki, bunu jurnalistlərə Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov bildirmişdir. O demişdir ki, ilk növbədə “fin qəsəbələri”ndə, hərbi hissələrin ərazilərində və məktəblərdə yaşayan məcburi köçkünlərin köçürülməsi planlaşdırılır. İndi “fin qəsəbələri”ndə 25 min, məktəblərdə 11 minə yaxın, hərbi şəhərciklərdə isə 6-7 min məcburi köçkün yaşayır. Dövlət Proqramına əlavə və dəyişikliklərə əsasən, onlar bu ildən başlayaraq üç il ərzində yeni salınan qəsəbələrə köçürüləcəklər. Artıq Goranboy rayonunun Aşağı və Yuxarı Ağcakənd qəsəbələrində xocalılar üçün 500, Beyləqan rayonu ərazisində Xocavənd köçkünləri üçün 500 ailəlik qəsəbələrin tikintisinə başlanmışdır. Goranboy rayonunda, həmçinin Kəlbəcərdən olan məcburi köçkünlər üçün sayca üçüncü qəsəbə inşa olunacaqdır.
Məcburi köçkünlərin məskunlaşdığı yataqxanaların təmirinə gəldikdə isə, onların Bakı və Sumqayıtda məskunlaşdıqları 130 yataqxananın təxminən yarısı təmir ediləcəkdir.
Bölmənin digər xəbərləri
