MƏCBURİ KÖÇKÜNLƏRİN SOSİAL VƏZİYYƏTİNİN YAXŞILAŞDIRILMASINA DÖVLƏT QAYĞISI ARTIR
Baş nazirin müavini, Dövlətqaçqınkomun sədri, Müşahidə Şurasının rəhbəri Əli Həsənov iclası açaraq, iştirakçıları Şuranın yeni tərkibi ilə tanış etdi.
Məcburi Köçkünlərin Sosial İnkişaf Fondunun direktoru Fikrət Topçubaşov başçılıq etdiyi qurumun fəaliyyəti barədə məlumat verərək dedi ki, MKSİF ötən dövrdə 12 layihəni başa çatdırmışdır. Bu layihələrə 563 min ABŞ dolları xərclənmişdir. Həmin layihələrin reallaşdırılmasından 6 min məcburi köçkün faydalanmışdır. 18 layihə üzərində isə iş başa çatmaq üzrədir. Bundan əlavə, 2 milyon ABŞ dolları məbləğində mikrokredit proqramı üzrə müqavilələr bağlanmışdır.
O, Fondun fəaliyyətinin nəticələrini, görülən tədbirlərin məcburi köçkünlərin həyat səviyyəsinin yaxşılaşdırılmasına təsirini öyrənmək məqsədi ilə köçkünlər arasında sosioloji sorğu keçirmək istədiklərini və bu məsələnin hazırda Dünya Bankı və Maliyyə Nazirliyi ilə razılaşdırıldığını bildirdi.
Sonra Müşahidə Şurasında Dünya Bankından alınması nəzərdə tutulan yeni kreditlə bağlı məsələ müzakirə edildi. Bildirildi ki, 10 milyon ABŞ dolları məbləğində vəsait infrastruktur mikrolayihələrinə və mikrokredit proqramına sərf ediləcəkdir. Dünya Bankının bu layihələrlə bağlı Azərbaycan hökumətinə müraciətinə iqtisadi inkişaf və maliyyə nazirliklərində baxılmış və onlar müsbət rəy vermişdir. Azərbaycan hökuməti həmin məsələ barədə Dünya Bankının nümayəndələri ilə bir neçə görüş keçirmişdir.
İclasda həmçinin qeyd edildi ki, ötən müddət ərzində Azərbaycanda 7 milyon ABŞ dolları məbləğində 190-dan çox mikrolayihə həyata keçirilmiş və 160 min məcburi köçkün bunun bəhrəsini görmüşdür.
Müşahidə Şurasının üzvləri, BMT-nin İnkişaf Proqramının, Qaçqınlar üzrə Ali Komissarlığının, ABŞ-ın Beynəlxalq İnkişaf Agentliyinin respublikamızdakı nümayəndələri müzakirə edilən məsələlərə münasibətlərini bildirdilər.
