Məhəmmədrəsul Məcidov: Məni İslamiadada yalnız qızıl medal qane edəcək
Bakı, 18 may, Pərvanə Rəhimova, AZƏRTAC
Azərbaycan yığmasının boksçusu Məmmədrəsul Məcidov AZƏRTAC-a müsahibəsində IV İslam Həmrəyliyi Oyunlarında iştirak etdiyi yarımfinalın təəssüratlarını bölüşüb və final haqqında planlarını danışıb.
“Etiraf edim ki, iordaniyalı rəqibim Hüsseyn İaşaiş məni bir qədər təəccübləndirdi. O, çox çevik idi. Odur ki, qələbə üçün maksimum səy göstərdim. Lakin ikinci raundda mübarizə artıq mənim təsirim altında keçdi və hər şey öz yoluna qoyuldu. İndi bütün fikirlərim finala yönəlib. Mən rəqibimin - suriyalı Manaf Əsədin həlledici döyüşünü müşahidə etdim. Məni yalnız qızıl medal qane edəcək, hər hansı digər nəticəni nəzərdə tutmuram”, - deyə M.Məcidov vurğulayıb.
Vətəndə keçirilən yarışda çıxış etməyin çox xoş olduğunu diqqətə çatdıran azərbaycanlı boksçu deyib: “Elə idmançılar ver ki, onlar öz ölkəsində müəyyən psixoloji gərginlik keçirirlər. Mən isə əksinə - sərbəst oluram, məni dəstəkləyən yerdə çıxış etmək çox xoşdur”.
Boksçu, həmçinin qeyd edib ki, finalda rəqibinə sürpriz edə bilər və döyüş taktikasını dəyişə bilər. “Hər rəqib üçün ayrıca taktikam var. Bir rəqibə qarşı bir döyüş tərzi, digərinə qarşı isə başqa yol seçirəm. Odur ki, finalda da rəqibimi təəccübləndirməyə çalışacağam”, - deyə M.Məcidov fikrini yekunlaşdırıb.
Bölmənin digər xəbərləri
