Məntəqə seçki komissiyasının sədri: Seçicilər səsvermədə çox yüksək əhvali-ruhiyyə ilə iştirak ediblər
Bakı, 7 fevral, AZƏRTAC
20 saylı Nərimanov II seçki dairəsinin 21 saylı səsvermə məntəqəsində prezident seçkiləri uğurla keçib. Bütün səsvermə məntəqələrində olduğu kimi, burada da seçicilər xüsusi fəallıq göstəriblər.
Məntəqə seçki komissiyasının sədri Yaqut Müseyibli AZƏRTAC-a müsahibəsində bildirib ki, bu gün keçirilən növbədənkənar prezident seçkiləri ölkəmizin ictimai-siyasi həyatında çox önəmli bir hadisədir.
Seçici siyahılarına görə, məntəqə üzrə 1226 seçici qeydə alınmışdı. Onlardan 30 nəfəri bu seçkilərdə ilk dəfə səs verənlər idi. Məntəqə bütün lazımi texniki vasitələrlə təmin edilmişdi. Səsvermənin gedişini izləmək üçün məntəqədə veb-kamera quraşdırılıb.
Bu gün müşahidəçilər və müxtəlif beynəlxalq təşkilatların nümayəndələri də seçki prosesini izləyiblər. Seçicilər azad, sərbəst və demokratik şəraitdə istədikləri namizədlərə səs veriblər.
“Mən bir vətəndaş kimi çox xoşbəxtəm ki, builki seçkilər işğaldan azad olunmuş ərazilərimizdə də keçirildi. Biz 20 il bundan öncə ürəyimizin istəyi ilə seçim etdik. Həmin seçimin nəticəsidir ki, Azərbaycan bu gün dünyanın öndə gedən ölkələrindən birinə çevrilib, torpaqlarımız işğaldan azad edilib, xalqımız öz arzularına çatıb. Seçicilər səsvermədə çox yüksək əhvali-ruhiyyə ilə iştirak ediblər”, - deyə Yaqut Müseyibli fikrini yekunlaşdırıb.
Bölmənin digər xəbərləri
