Mərkəzi Bankın dəstəyi ilə maliyyə savadlılığı müsabiqəsi keçirilib
Bakı, 1 may, AZƏRTAC
Mərkəzi Bank, Təhsil Nazirliyi, Gənclər Fondunun dəstəyi və "Azərbaycan Gənclərinin Nailiyyəti" İctimai Birliyinin təşkilatçılığı ilə "Ağıllı Büdcə" layihəsi çərçivəsində öyrədici rəsmli divar elanı - poster müsabiqəsi keçirilib.
Bankdan AZƏRTAC-a bildirilib ki, tədbirin əsas məqsədi şagirdlərin maliyyə savadlılığı üzrə mövzuları ictimaiyyətə tanıtmaq üçün poster üzərinə köçürərək təqdim etmələrini, onların yaradıcı düşüncələrinin inkişafını, ümumilikdə onlar arasında maliyyə savadlılığını təşviq etməkdən ibarət olub. İki mərhələdə keçirilən layihənin ilkin mərhələsində 300 şagird interaktiv büdcə planlaşdırılması, ona nəzarət, gəlir, xərc və qənaət kimi anlayışlarla daha dərindən tanış olub, bu mövzuda praktiki bacarıqlarını artırıblar. Növbəti mərhələdə isə 23 komandadan ibarət 168 şagird posterlərlə müsabiqədə iştirak edib. Komandalar büdcə, bank, bank kartları, vergi, sığorta və sair mövzularda əldə etdikləri bilik və bacarıqları nümayiş etdirmək üçün posterlər hazırlayıblar.
İsveçrə Əməkdaşlıq Təşkilatının Cənubi Qafqaz üzrə nümayəndəliyi, Təhsil Nazirliyi, Mərkəzi Bankın əməkdaşlarından və müstəqil ekspertlərdən ibarət münsiflər heyəti təqdim olunmuş posterləri kreativ düşüncə, mesajın aydınlığı və təqdim etmə qabiliyyətinə görə qiymətləndirərək 3 ən yaxşı poster hazırlayan komandanı müəyyənləşdiriblər. Qalib komandalara sertifikatlar və hədiyyələr təqdim olunub.
Mərkəzi Bank tərəfindən müxtəlif hədəf qruplarının maliyyə savadlılığının artırılması məqsədilə maarifləndirmə və təbliğat-təşviqat tədbirlərinin keçirilməsi, o cümlədən bu istiqamətdəki təşəbbüslərin dəstəklənməsi gələcəkdə də davam etdiriləcək.
Bölmənin digər xəbərləri
