Mərkəzi Nəbatat Bağında aparılan bərpa-yenidənqurma işləri davam edir - Reportaj
Bakı, 5 may, Elmir Səftərov, AZƏRTAC
Mərkəzi Nəbatat Bağı ərazisində qeyri-qanuni tikilən Şəki, Qələbə restoranları və avtomobil təmiri sexləri sökülüb, həmin ərazidə isə yaşıllaşdırma aparılacaq.
AZƏRTAC-ın müxbiri Mərkəzi Nəbatat Bağında görülən və aparılacaq işlərlə tanış olub.
Qeyd edək ki, yuxarıda göstərilənlərdən əlavə, Bağda göl salınacaq və amfiteatrın inşası da nəzərdə tutulur. Həmçinin ərazidə uşaqlar üçün meydança da salınacaq.
Aparılacaq işlər çərçivəsində Mərkəzi Nəbatat Bağında qəzalı vəziyyətdə olan bir və iki mərtəbəli 10-na yaxın bina artıq sökülüb və onların ərazisində yaşıllıqlar salınacaq.
Bakı Şəhər İcra Hakimiyyətinin şöbə müdiri Elmin İmanov deyib ki, Mərkəzi Nəbatat Bağı ərazisində hər hansı ictimai iaşə obyektinin tikilməsi nəzərdə tutulmur. Təsdiqlənmiş layihə əsasında yenidənqurma işləri çərçivəsində park içərisində geniş meşə və yaşıllıq örtüyü yaradılır, ağacların sayı artırılır.
O bildirib ki, Nəbatat Bağında insanların asudə vaxtını səmərəli keçirmələri üçün işlər görülür. Ərazidə alimlər və mütəxəssislər işləyir, analizlər aparırlar.
“Bağda böyük oranjereya olacaq. Oranjereyanın birində tropik, digərində isə subtropik bitkilər saxlanılacaq. Əraziyə gələn insanlar isə həm bağı gəzəcək, həm də bitkilərlə tanış olacaqlar”, - deyə E.İmanov qeyd edib.
Elm və Təhsil Nazirliyinin nəzdində Botanika İnstitutunun direktoru Səyyarə İbadullayeva isə bildirib ki, Botanika İnstitutunun sökülməsi ilə bağlı şayiələr həqiqəti əks etdirmir. O, Bakı Şəhər İcra Hakimiyyətinin başçısı Eldar Əzizovun onlarla görüşdüyünü və problemləri ilə maraqlandığını bildirib.
Mərkəzi Nəbatat Bağında Qida və dərman bitkiləri biokimyası laboratoriyasının müdiri, biologiya elmləri doktoru Həsən Babayev isə bağda xəstə ağaclar barədə danışıb. O qeyd edib: “Xəstə ağaclar əsasən Eldar şamı və sərv, ümumilikdə isə iynəyarpaqlılardır. Ağacların xəstələnməsi və quruması bu yaxınlarda deyil, illər öncə baş verib. Xəstəliklərlə mübarizə isə 2021-ci ilin sonlarından başlayıb. Qurumuş 94 ağac üçün rəy verilmişdi, onlardan 65-i götürülüb. Ağaclarda olan xəstəliklər təkcə bizim ölkədə deyil. Bu proseslər Gürcüstanda, Türkiyədə, Rusiyada, İspaniyada, ABŞ-da, Almaniyada, Yunanıstanda və digər ölkələrdə də gedir. Alimlər və mütəxəssislər xəstəliklərlə bağlı iş aparırlar. Türkiyədən, Rusiyadan və İsraildən olan mütəxəssisləri monitorinq üçün ölkəmizə dəvət etmişdik.
Biz mütəmadi olaraq ağacları müayinə edirik. İnyeksiya olunmuş ağaclarda müəyyən inkişaf var. Belə ki, ağaclarda olan quruma və digər mənfi proseslər inyeksiya vasitəsilə dayanır. Xəstəliyi olan və sağalmayan ağaclar isə utilizasiya olunur. Təkcə Bakıda ötən il 3 min ağac kəsilərək utilizasiya edilib”.
Xatırladaq ki, mayın 3-də Ekologiya və Təbii Sərvətlər Nazirliyinin və Bakı Şəhər İcra Hakimiyyətinin (BŞİH) nümayəndələri yenidənqurma və abadlıq işləri aparılan Mərkəzi Nəbatat Bağına baxış keçiriblər.
Bölmənin digər xəbərləri
