MƏTBUAT AZADLIĞI GÜNÜ MÜNASİBƏTİLƏ DƏYİRMİ MASA KEÇİRİLMİŞDİR
Səfirliyin ictimaiyyətlə əlaqələr üzrə attaşesi Conatan Henik Birləşmiş Ştatlarda mətbuatın tarixindən, inkişaf istiqamətlərindən, bugünkü vəziyyətindən söz açmış, qazanılmış uğurları diqqətə çatdırmışdır.
O, ABŞ hökumətinin mətbuatın inkişafı ilə bağlı layihələrə hər il 40 milyon dollar vəsait ayırdığını, amerikalı mütəxəssislərin müxtəlif ölkələrədə həmkarlarına təlimlər keçdiyini bildirmişdir. Bundan əlavə, Dövlət Departamenti bu ildən yeni proqramın - jurnalist Edvard Murrounun adını daşıyan proqramın icrasına başlamışdır. Proqramın ilk iştirakçıları arasında 2 azərbaycanlı jurnalist də olmuşdur.
E.Murrou proqramın ilk iştirakçılarından olan Azərbaycan Dövlət Teleqraf Agentliyinin (AZƏRTAC) əməkdaşı Yalçın Əliyev bildirmişdir ki, ABŞ-ın dövlət katibi Kondoliza Raysın təşəbbüsü ilə dünyanın 105 ölkəsindən 130-a yaxın jurnalist üçün həyata keçirilən üçhəftəlik proqram çərçivəsində jurnalistlər Vaşinqtonla yanaşı, bir sıra digər şəhərlərdə də olmuş, dövlət nümayəndələri, analitik mərkəzlərin rəhbərləri, nüfuzlu universitetlərin professorları ilə çoxsaylı görüşlər keçirmiş, ABŞ-ın federal və yerli idarəçilik prinsipləri ilə daha yaxından tanış olmuşlar. Keçirilən seminar və simpoziumlarda jurnalistikanın gələcəyi ilə bağlı fikir mübadiləsi aparılmışdır. Proqramın sonunda dövlət katibi Kondoliza Rays jurnalistlər qarşısında çıxış etmiş, onların suallarına cavab vermişdir.
Dəyirmi masada ölkəmizdə mətbuat azadlığının təmin olunması istiqamətində görülmüş işlərdən, həyata keçirilən layihələrdən söz açılmış, qanunvericilik bazasının təkmilləşdirildiyi bildirilmişdir.
