ELM VƏ TƏHSİL
Mətbuat Şurası ali məktəblərin jurnalistika fakültələrinə qəbulu stimullaşdırır
![Mətbuat Şurası ali məktəblərin jurnalistika fakültələrinə qəbulu stimullaşdırır](/files/2014/2/1200x630/14090745606030132987_1200x630.jpg)
Bakı, 25 iyul (AZƏRTAC). Mətbuat Şurası abituriyentlərin jurnalistika üzrə qabiliyyət testində iştirakını stimullaşdırmaq üçün ali təhsil təqaüdü təsis edib. Təqaüd 500 bal həddini keçərək qabiliyyət imtahanında iştirakını təsdiqləmiş və sonrakı mərhələdə tələbə adını qazanmış ilk 10 abituriyentə veriləcək.
AZƏRTAC xəbər verir ki, bunu Azərbaycan Mətbuat Şurasının və Tələbə Qəbulu üzrə Dövlət Komissiyasının tərkibində yaradılmış qabiliyyət imtahanı komissiyasının sədri Əflatun Amaşov mətbuata açıqlamasında deyib.
Ə.Amaşov bildirib ki, jurnalistika ixtisasına qəbul olunmaq üçün qeydiyyatdan keçmiş və III ixtisas qrupu üzrə imtahan verərək müsabiqə şərtini ödəyən 441 abituriyent var. Onlar 200 bal həddini aşıblar. Abituriyentlərdən 247-si imtahanı paytaxtda, digərləri isə bölgələrdə verəcək. 441 nəfərin 10 faizinin topladığı bal 500-dən yuxarıdır. Təhsil təqaüdü məhz onların sırasından fərqlənənlərə veriləcək.
Qeyd edilib ki, jurnalistika ixtisasını seçən abituriyentlər qabiliyyət imtahanı mərhələsində təqdim olunmuş mövzu üzrə inşa - esse yazacaqlar. Yazı işi abituriyentin imtahan verdiyi bölmədən asılı olaraq Azərbaycan və rus dillərində yerinə yetirilməlidir.
Diqqətə çatdırılıb ki, abituriyentlərin ictimai-siyasi, iqtisadi, mədəni həyata, həmçinin görkəmli şəxsiyyətlərin ömür yoluna, bəşəriyyəti narahat edən problemlərə dair məsələlər ətrafında müstəqil mühakimə yürütmək qabiliyyəti, əsaslandırmaq bacarığı yoxlanılacaq. Qiymət həm yazılan inşanın məzmunu, həm də yazı savadı nəzərə alınaraq veriləcək. Abituriyentlər inşa üçün müvafiq tələblərlə də tanış olacaqlar. İlk dəfə keçiriləcək qabiliyyət imtahanı üçün hazırlıq işləri artıq başa çatıb.
Ali təhsil təqaüdünün məbləği ilkin mərhələdə 60 manat olacaq və müvafiq təhsil şərtlərini ödəyən tələbələrə hər ay ödəniləcək.