MİKAYIL ABDULLAYEVİN TRİPTİXİ İKİNCİ ÖMRÜNÜ YAŞAMAĞA BAŞLAMIŞDIR
AZƏRTAC xəbər verir ki, iyunun 13-də R.Mustafayev adına Azərbaycan Dövlət İncəsənət Muzeyində xalq rəssamı, Cəvahirləl Nehru adına Beynəlxalq mükafat və Azərbaycan Dövlət mükafatı laureatı, professor Mikayıl Abdullayevin 1964-65-ci illərdə çəkdiyi triptixin - “41-ci ilin iyunu”, “Əsgər”, “Hospital” əsərlərinin təqdimatı olmuşdur.
Muzeyin direktoru İsrafil İsrafilov demişdir ki, bu əsərlər faşizm üzərində Qələbənin 40 illiyinə həsr olunmuş sərgidə iştirak üçün Azərbaycan Mədəniyyət Nazirliyinin 1985-ci il 9 aprel tarixli qərarına müvafiq olaraq, SSRİ Dövlət Rəsm Qalereyasına göndərilmişdi. Sovet imperiyası dövründə bu, təbii hal idi. Dövlət miqyaslı hər hansı tədbirdə iştirak üçün incəsənət əsərləri respublikalardan mərkəzə göndərilirdi.
Lakin son illər baş vermiş məlum ictimai-siyasi hadisələr nəticəsində həmin əsərlər geri qaytarılmamış və 2008-ci ilədək Rusiya Federasiyasının bədii fondlarında saxlanılmışdır. Bu əsərləri üzə çıxarmaq üçün xeyli vaxt sərf olunmuşdur. İ.İsrafilov M.Abdullayevin əsərlərinin axtarılıb tapılmasında göstərilmiş köməyə görə Mədəniyyət və Turizm Nazirliyinin, şəxsən nazir Əbülfəs Qarayevin rolunu xüsusi vurğulamışdır.
Muzeyin direktoru demişdir: “Aparılan danışıqlardan sonra müəllifin Tretyakovsk qalereyasında saxlanılan üç əsəri Vətənə qaytarılmış və Dövlət İnsəcənət Muzeyi fondunda layiqli yer tutmuşdur. İndi əminliklə demək olar ki, xarici ölkələrdəki milli təsviri sənət nümunələrinin qaytarılması prosesi başlanmışdır və uğurla davam etdiriləcəkidir.
Bölmənin digər xəbərləri
