MİLLİ MƏCLİS BƏZİ RAYON VƏ KƏND ADLARININ DƏYİŞDİRİLMƏSİNƏ RAZILIQ VERMİŞDİR
AZƏRTAC xəbər verir ki, Milli Məclisin aprelin 25-də keçirilmiş iclasında əvvəlcə cari məsələlər müzakirə olunmuş, spiker Oqtay Əsədov deputatların qaldırdıqları məsələlərə münasibət bildirmişdir.
Sonra Milli Məclisin regional məsələlər daimi komissiyasının üzvü Tahir Rzayev “Azərbaycan Respublikasının Xızı rayonun Xızı qəsəbəinə şəhər statusunun verilməsi haqqında” qanun layihəsini müzakirəyə təqdim etmişdir. Bildirilmişdir ki, regionların sosial-iqtisadi inkişafı Dövlət proqramının icrası nəticəsində Xızı rayonunda, eləcə də eyniadlı qəsəbədə bir sıra yeni ictimai-iaşə obyektləri, infrastruktur yaradılmışdır. Bu və digər müsbət amillər Xızı qəsəbəsinə şəhər statusunun verilməsi zərurətini yaratmışdır.
Deputatlar Xızı qəsəbəsinə şəhər statusunun verilməsini müsbət qarşılamışlar.
“Azərbaycan Respublikasının Qobustan rayonunun inzibati ərazi bölgüsündə qismən dəyişikliklər edilməsi haqqında” və “Azərbaycan Respublikasının Bərdə rayonunun Canavarlı kəndinin adının dəyişdirilməsi haqqında” qanun layihələri də deputatlar tərəfindən razılıqla qarşılanmış, Canavarlı kəndinin Seyid Yusifli adlandırılması məqsədəuyğun hesab olunmuşdur.
Həmin komissiyanın digər üzvü Rüstəm Xəlilov isə “Azərbaycan Respublikasının Əli Bayramlı şəhərinin Şirvan şəhəri adlandırılması haqqında” və “Azərbaycan Respublikasının Xanlar rayonunun Göygöl rayonu adlandırılması haqqında” qanun layihələri barədə məlumat vermişdir.
R.Xəlilov demişdir ki, Əli Bayramlı şəhəri ötən əsrin əvvəllərində 101 kəndi ətrafında birləşdirən mərkəz olmuş və 1954-cü ildə ona respublika tabeçiliyində şəhər statusu verilmişdir.
Şəhər ictimaiyyəti dəfələrlə məsələni geniş şəkildə müzakirə etmiş və yaşadıqları şəhərin inqilabçı Əli Bayramovun adını daşımasının tərəfdarı olmadıqlarını bildirmişlər. Şəhərin Şirvan adlandırılması daha məqsədəuyğun hesab olunmuşdur. Vaxtilə həmin ərazidə bu adda yaşayış massivi olmuş, indi də şəhərdə Şirvan adı ilə çoxsaylı müəssisələr fəaliyyət göstərir.
Deputat bildirmişdir ki, Xanlar rayonunun əhalisi də rayonun adının dəyişdirilərək Göygöl adlandırılması barədə Milli Məclisə müraciətlər etmişdir. Daxil olan teleqram və müraciətlərdə məşhur Göygölün bu rayonun ərazisində yerləşdiyi əsas gətirilir.
Deputatlar qanun layihələri ətrafında geniş fikir mübadiləsi aparmış, coğrafi adların dəyişdirilməsi prosesində tarixiliyə üstünlük verilməsinin zəruriliyini vurğulamış və hər iki şəhərin adlarının dəyişdirilməsinə razılıq vermişlər.
Axşam iclasında “Azərbaycan Respublikasında xarici dövlətlərin və beynəlxalq təşkilatların bayraqlarının istifadəsi qaydaları haqqında” qanun layihəsi müzakirə olunmuşdur. Bildirilmişdir ki, bu qanun Azərbaycanda xarici dövlətlərin və beynəlxalq təşkilatların bayraqlarından istifadə qaydaları ilə bağlı hüquqi normaları və münasibətləri tənzimləyəcəkdir.
Layihədə deyilir ki, Azərbaycan vətəndaşları, habelə ölkəmizin ərazisində olan əcnəbilər və vətəndaşlığı olmayan şəxslər xarici dövlətlərin və beynəlxalq təşkilatların bayraqlarına hörmətlə yanaşmalıdırlar.
Qanun layihəsində Azərbaycanda xarici dövlətlərin və beynəlxalq təşkilatların bayraqlarının istifadəsinə dair məhdudiyyətlər, qanunun pozulmasına görə məsuliyyət və sair müddəalar da əksini tapmışdır.
Qanun layihəsi geniş müzakirə olunduqdan sonra ikinci və üçüncü oxunuşlarda qəbul olunmuşdur.
Daha sonra “Könüllülük fəaliyyəti haqqında” qanun layihəsinə baxılmışdır. Məlumat verilmişdir ki, bu qanun fiziki şəxslərin könüllü - öz istəyi əsasında əvəzi ödənilməyən ictimai-faydalı fəaliyyəti sahəsində yaranan münasibətlərin hüquqi əsaslarını müəyyən edəcəkdir. Qeyd olunmuşdur ki, könüllülük fəaliyyəti adı altında dini təriqətlərin yayılması, müharibə, zorakılıq və dözümsüzlüyün təbliğ edilməsi, irqi, milli, dini ədavətin qızışdırılması qadağandır.
Deputatların rəy və təklifləri dinlənildikdən sonra qanun layihəsi birinci oxunuşda qəbul edilmişdir.
Bölmənin digər xəbərləri
