İclasda cari məsələlərin müzakirəsi zamanı deputatlar prezidentliyə bəzi namizədlərin televiziya ilə çıxışlarına münasibət bildirdilər. Qeyd edildi ki, prezidentliyə müxalifətdən olan namizədlərin efir vasitəsi ilə antikonstitusion çağırışlarına, təhqiramiz ifadələrinə son qoyulması üçün təsirli tədbirlər görülməlidir.

Sonra gündəlikdə duran məsələlər müzakirə olundu. Parlamentin sosial siyasət məsələləri daimi komissiyasının sədri Hadı Rəcəbli “Şəhid adının əbədiləşdirilməsi və şəhid ailələrinə edilən güzəştlər haqqında” Qanuna əlavələr edilməsi barədə məlumat verdi.

Qanunun 3-cü maddəsinin ikinci hissəsinə təklif olunan əlavədə deyilir: “Dövlət ali və orta peşə-ixtisas təhsilli müəssisələrində ödənişli formada təhsil alanlar təhsil haqqını ödəməkdən azad olunur.”

Hadı Rəcəbli dedi ki, Qanuna əlavə dövlət ali və orta ixtisas təhsil müəssisələrində ödənişli formada təhsil alan məcburi köçkünlərin təhsil haqqını ödəməkdən azad edilməsi barədə Azərbaycan Prezidentinin məlum Sərəncamını daha da genişləndirir. Şəhid ailələrinin övladlarının da təhsil haqqından azad edilmələri dövlətimizin başçısının onlara göstərdiyi qayğının bariz nümunəsidir.

Deputatlar bu əlavənin Azərbaycanın manafeyini daxildə və xarici ölkələrdəki dipkorpuslarda fəaliyyət göstərərkən şəhid olanların ailələrinə, eləcə də özəl təhsil ocaqlarında təhsil alan şəhid uşaqlarına da şamil olunmasını təklif etdilər.

Komissiya sədri dedi ki, təkliflər gələcəkdə nəzərə alına bilər. Amma hələlik Qanuna edilən əlavə şəhid statusu alan ailələrə şamil olunacaqdır. Yeni ilin dövlət büdcəsi haqqında qanun qəbul olunanadək şəhid ailələrindən olan tələbələrin təhsil haqqı həmin müəssisələr tərəfindən ödəniləcəkdir.

Qanun layihəsi təsdiq edildikdən sonra deputatlar “Lotereyalar haqqında” Qanun layihəsini ikinci oxunuşda müzakirə etdilər.

Parlamentin iqtisadi siyasət daimi komissiyasının sədri Səttar Səfərov dedi ki, layihə Milli Məclisin yaz sessiyasında müzakirə olunarkən səslənən irad və təkliflərin əksəriyyəti nəzərə alınmışdır. Bu qanun Azərbaycan Respublikasında lotereyaların təşkili və keçirilməsi sahəsində münasibətlərin tənzimlənməsinin hüquqi əsaslarını, habelə lotereyaların təşkilatçılarının və iştirakçılarının vəzifə və hüquqlarını müəyyən edir.

Layihədə lotereya oyunlarının keçirilməsi üzrə tiraj komissiyasının üzvlərinin 5 nəfərdən az olmaması, sədrin adi səs çoxluğu ilə seçilməsi, KİV və ictimai təşkilatların nümayəndələrinin də tiraj komissiyasında təmsil olunması və digər vacib məsələlər öz əksini tapmışdır. Bundan başqa, tirajlı lotereyanın uduş fondunun minimum həcmi həmin tiraj üzrə lotereya biletlərinin ümumi məbləğinin 50 faizindən və ya həmin tirajın satılmış lotereya biletlərinin ümumi məbləğinin 50 faizindən az olmamalıdır. Eyni zamanda, ani lotereyanın uduş fondunun həcmi də lotereya biletlərinin ümumi məbləğinin 50 faizindən az olmamalıdır. Layihədə uduşa düşmüş əşyaların pul ekvivalenti ilə ödənilməsi qaydaları da göstərilmişdir.

Qeyd edildi ki, lotereya hesabına dövlət büdcəsinə xeyli vəsait daxil olmuşdur. Bu ilin əvvəlindən bəri 29 milyon 624 min lotereya bileti satılmış və bundan 72 milyard manat gəlir əldə edilmişdir. Keçirilən oyunlar zamanı oyunçulara 40 milyard manat uduş ödənilmişdir. Azərlotereya ilin ötən aylarında 8 milyard manat vergi ödəyib.

Azərlotereya dövlət büdcəsindən vəsait almayıb və 100 milyon manatlıq nizamnamə kapitalına da toxunulmayıb.Layihə ikinci oxunuşda əsas kimi qəbul olunduqdan sonra “Şəkərli diabet xəstəliyinə tutulmuş şəxslərə dövlət qayğısı haqqında” Qanun layihəsi müzakirəyə çıxarıldı. Layihə ilə bağlı Milli Məclisin sosial siyasət məsələləri daimi komissiyasının sədri Hadı Rəcəbli məlumat verdi.

Komissiya sədri dedi ki, qanun layihəsini işləməkdə məqsəd şəkərli diabet xəstələrə dövlət qayğısını artırmaq, onların pulsuz dərmanlarla təmin olunmasına, eləcə də bu problemlə bağlı Milli Proqramın hazırlanmasına nail olmaqdır.

Layihənin müəllifi, deputat Vəsadət Əzizov dedi ki, rəsmi statistikaya görə ölkədə 50 min şəkərli diabet xəstəsi vardır. Aparılan son hesablamalara görə isə bu rəqəmin təxminən 2-3 dəfə artıq olduğu bəlli olmuşdur. Xəstəliyin profilaktikası ilə respublikada 5 dispanser, Gəncədə 1 xəstəxana və 3 cəmiyyət məşğuldur. Xəstələrin müalicəsi, dərman preparatları ilə təmin olunması üçün büdcədən ayrılan vəsait azlıq təşkil etdiyi üçün müəyyən çətinliklər yaranmışdır. Digər tərəfdən respublikaya gətirilən dərman preparatlarına 18 faiz əlavə dəyər vergisinin tətbiqi də problemlər yaradır. Qanunun problemlə bağlı Milli Proqramın qəbuluna da zəmin yaradacağı xüsusi vurğulandı. Layihə birinci oxunuşda qəbul edildi.