Milli Məclis sədrinin müavini: Hibrid hücumlara qarşı fəal mübarizəyə hazır olmalıyıq
Bakı, 23 dekabr, AZƏRTAC
Milli Məclisin Xarici müdaxilələrə və hibrid təhdidlərə qarşı komissiyası tərəfindən “COP29-a qarşı hibrid hücumlar: Cəmiyyətimiz hibrid təhdidlərin qurbanı olmamalıdır!” adlı hesabat hazırlanıb. Belə bir hesabatın hazırlanması əhəmiyyətlidir.
Bu fikirləri AZƏRTAC-a müsahibəsində Milli Məclis sədrinin müavini Musa Qasımlı deyib. O bildirib ki, dünyada yalan informasiyalar baş alıb getdiyi bir dövrdə onların doğruluğunu yoxlamaq çox vaxt olmur. Bu baxımdan sözügedən hesabat həqiqətlərin çatdırılmasına xidmət edəcək.
“Belə böhtan xarakterli hücumları BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) ölkəmizdə keçirildiyi günlərdə gördük. Ağla sığmayan böhtanların atılması ölkəmizə və xalqımıza qarşı düşmən mövqeyinin təzahürləri idi. Amma həmin dairələrin niyyətləri baş tutmadı. Prezident İlham Əliyevin rəhbərliyi ilə Azərbaycan COP29-a aid bütün tədbirləri ən yüksək səviyyədə keçirdi və bir nümunə yaratdı. Bütün bunlara baxmayaraq, hibrid hücumlara qarşı fəal mübarizəyə açıq və hazır olmalıyıq. Cəmiyyətimizin belə hücumların qurbanına çevrilməsinə yol verməməliyik. Xüsusən gənc nəsil ayıq-sayıq olmalıdır. Belə hücumlar cəmiyyətimizi daxildən zəiflətmək və parçalamaq məqsədi daşıdığından hər bir azərbaycanlı çox diqqətli olmalı, yalanları ifşa etməli, Azərbaycan həqiqətlərini çatdırmalıdır”, - deyə Musa Qasımlı fikrini yekunlaşdırıb.
Bölmənin digər xəbərləri
