Milli Məclisin Mədəniyyət komitəsinin sədri şəhid Mehman Əliyevin ailə üzvləri ilə görüşüb
Bakı, 1 fevral, AZƏRTAC
Milli Məclisin mədəniyyət komitəsinin sədri Qənirə Paşayeva Tərtər şəhər Uşaq Musiqi Məktəbinin müəllimi olmuş şəhid Mehman Sovet oğlu Əliyevin həyat yoldaşı Aynurə Əliyevaya və şəhidin qızı Nuranə Əliyeva ilə Mədəniyyət Komitəsində görüşüb.
AZƏRTAC xəbər verir ki, Q.Paşayeva şəhid mədəniyyət işçisinin ailəsinin qayğıları ilə maraqlanıb, ürək sözlərini bölüşüb: “Tərtər şəhər Uşaq Musiqi Məktəbinin müəllimi olmuş Mehman Əliyev Vətən müharibəsi zamanı Ermənistan silahlı qüvvələrinin Tərtərdəki mülki yaşayış məntəqələrini, döyüş sahəsindən uzaqdakı mülki obyektləri ağır silahlardan atəşə tutması nəticəsində şəhid olub. Rəşadətli Ordumuzun fədakarlığı sayəsində torpaqlarımız, o cümlədən tarixi-mədəni abidələrimiz, mədəniyyət müəssisələrimiz Ermənistanın işğalından azad olunub, xalqımızın 30 illik həsrətinə son qoyulub, şəhidlərimizin ruhu şad olub.
Beləliklə, abidələrimizi təmir-bərpa etmək, onların dağılmasının qarşısını almaq və yeni mədəniyyət müəssisələri tikərək, bölgələrimizin mədəni ənənələrini, ümumən mədəni həyatı canlandırmaq imkanları yaranıb. Ulu Tanrıya çox şükürlər olsun, şəhidlərimizin qanı yerdə qalmayıb. Azərbaycan tarixi zəfər qazanıb”.
Şəhidin ailə üzvləri səmimi görüş üçün komitə sədrinə təşəkkür edib.
Bölmənin digər xəbərləri
