MİN İLLƏRİN YADDAŞINI OYATMAQ İSTƏYƏN RƏSSAMIN FƏRDİ SƏRGİSİ
Azərbaycan təsviri sənətində özünəməxsus yolu olan tanınmış rəssam Yusif Mirzənin Bakı incəsənət mərkəzində böyük Norveç alimi və səyyahı Tur Heyerdalın xatirəsinə həsr edilmiş “Min illərin yaddaşını oyatmaq istəyirəm” adlı fərdi sərgisi açılmışdır.
Əsərləri ABŞ, İngiltərə, İrlandiya, Almaniya, İsveç, Fransa, Danimarka və başqa ölkələrin muzeylərini, şəxsi kolleksiyaları qiymətli eksponat kimi bəzəyən fırça ustasının bu sərgisində qrafika, heykəltəraşlıq, rəngkarlıq janrlarında 60-dan artıq işi nümayiş etdirilir.
Mərkəzdən AZƏRTAC-a bildirmişlər ki, Norveç Krallığının ölkəmizdəki fövqəladə və səlahiyyətli səfiri Steynar Gilin də iştirakçısı olduğu mərasimdə çıxış edən natiqlər, eramızdan əvvəlki minilliklərdəki qayaüstü rəsmlərin ənənələrini müasir sənətə gətirən Y.Mirzəni fərdi sərgisi münasibətilə təbrik etdilər, ona yeni yaradıcılıq uğurları arzuladılar.
Axırda Yusif Mirzə sərginin sponsorları və təşkilatçılarına- Norveç Krallığının Azərbaycandakı səfirliyinə, “Statoyl” neft şirkətinə, Norveç Humanitar Müəssisəsinə, Bakı incəsənət mərkəzinə və iştirakçılara öz minnatdalığını bildirdi.
Bölmənin digər xəbərləri
