MİNGƏÇEVİR MƏZUNLARI ÜÇÜN SON ZƏNG ÇALINMIŞDIR
AZƏRTAC-ın müxbiri xəbər verir ki, mayın 31-də Mingəçevirin orta ümumtəhsil məktəblərini bitirən 1500 şagird üçün son zəng çalınmışdır.
Həmişə zəng onbirinciləri dərsə səsləyirdisə, həmin gün çalınan zəng onların məktəb illəri ilə bağlı həyatındakı sonuncu zəng idi. Məzunlar doğma məktəblərindən və bir-birilərindən ayrı düşəcəklərinə görə kədərlənir, müstəqil həyata ilk addım atdıqlarına və gələcək karyeralarını qurmaq barədə düşündüklərinə görə sevinirdilər. Onların sevincinə şəhər icra hakimiyyətinin, bələdiyyənin, idarə və təşkilatların əməkdaşları, minlərlə mingəçevirli də qoşulmuşdu.
Bu əlamətdar gün münasibətilə məktəblərdə bayram şənlikləri təşkil edilmiş, məzunlara təbriklər ünvanlanmış, şeirlər, mahnılar oxunmuşdur. Hamının gözlədiyi son zəng çalındıqdan sonra məzunlar bayram tədbirlərini şəhər gəzintisi ilə davam etdirmişlər.
Şəhər rəhbərliyinin tapşırığı ilə Heydər Əliyev meydanında, Sahil və Gənclər parklarında yeniyetmələrin mənalı istirahəti üçün lazımi şərait yaradılmış, əyləncə və istirahət mərkəzləri onların ixtiyarına verilmişdir.
Həmin gün park və xiyabanlarda, əhalinin çox olduğu yerlərdə asayiş qorunmuş, baş verə biləcək hər hansı xoşagəlməz hadisənin vaxtında qarşısının alınması məqsədi ilə Mingəçevir şəhər polis şöbəsinin əməkdaşları gücləndirilmiş iş rejimində çalışmışlar.
Məzunlar üçün son zəng çalınsa da, onlar hələ doğma məktəbdən ayrılmırlar, çünki buraxılış imtahanları verəcəklər.
Bölmənin digər xəbərləri
