MİNGƏÇEVİRDƏ MƏCBURİ KÖÇKÜNLƏR ÜÇÜN YENİ ŞƏHƏRCİK TİKİLİR
Yaponiya hökumətinin yoxsulluğun azaldılması proqramı tərəfindən maliyyələşdirilən bu şəhərciyi “Dünyaya baxış” beynəlxalq humanitar təşkilatı inşa edir. Tikinti işlərinin başlanması münasibətilə təntənəli toplantı keçirilmiş, ilk yaşayış evinin təməlqoyma mərasimi olmuşdur. İcra hakimiyyətinin başçısı Məhəbbət Qarabağlı, “Mingəçevirdə məcburi köçkünlərin inteqrasiyası proqramı”nın əməliyyat direktoru Mark Qrosso, Dövlət Qaçqınkomun tikinti idarəsinin rəisi Ələddin Məmmədov əlamətdar hadisə münasibətilə məcburi köçkünləri təbrik etmişlər. Məcburi köçkünlər şəhərciyin tikintisini Azərbaycan Prezidenti Heydər Əliyevin yurd-yuvasından didərgin düşmüş həmvətənlərimizə göstərdiyi diqqət və qayğının daha bir təzahürü kimi qiymətləndirmişlər.
Şəhərcikdə tikinti-quraşdırma işləri bir il müddətində başa çatdırılacaqdır. Burada 80 məcburi köçkün də işə cəlb olunmuşdur. Şəhərcikdə olimpiya avarçəkmə bazasında və 4 orta məktəbdə müvəqqəti məskunlaşmış 1780 nəfər məcburi köçkün yerləşdiriləcəkdir.
