Misir ictimaiyyətinə ermənilərin Azərbaycan xalqına qarşı törətdikləri vəhşiliklər barədə məlumat verilmişdir
Bakı, 2 may (AZƏRTAC). Misirin Əl-Əzhər Universitetində “Azərbaycan ilə Misir arasında diplomatik əlaqələrin qurulmasının 20 illiyi: nailiyyətlər və perspektivlər” mövzusunda konfrans keçirilmişdir.
Əl-Əzhər ərəb-İslam dünyasının ən qədim və nüfuzlu ali təhsil müəssisələrindən biridir və universitetdə dünyanın əksər ölkələrindən iki milyondan artıq tələbə təhsil alır.
Azərbaycanın Misir Ərəb Respublikasındakı səfirliyindən AZƏRTAC-a bildirmişlər ki, tədbirdə Əl-Əzhər Universitetinin müəllim və tələbə kollektivi, elmi-tədqiqat mərkəzlərinin, qeyri-hökumət təşkilatlarının və kütləvi informasiya vasitələrinin nümayəndələri iştirak etmişlər.
Konfransda çıxış edən səfir Şahin Abdullayev Azərbaycanın ərəb-İslam dünyası ilə tarixi əlaqələrindən danışmışdır. Diplomat iyirmi illik müstəqillik dövründə Azərbaycanın əldə etdiyi siyasi və iqtisadi uğurlar, neft-qaz strategiyası, ölkəmizin bugünkü inkişaf səviyyəsinə çatmasında Azərbaycan xalqının ümummilli lideri Heydər Əliyevin əvəzedilməz rolu, Ermənistan-Azərbaycan, Dağlıq Qarabağ münaqişəsi və onun fəsadları, respublikamızın işğal olunmuş ərazilərində maddi-mədəniyyət abidələrimizin və xüsusilə dini ibadət ocaqlarının talan edilməsi halları barədə ətraflı məlumat vermişdir. Azərbaycan xalqının mədəni və ictimai-siyasi həyatında mühüm rola malik olan Şuşa şəhərinin ermənilər tərəfindən işğal edilməsi, onun tarixi və dini abidlərinin dağıdılması halları xüsusilə qeyd olunmuşdur.
Ş.Abdullayev Azərbaycan-Misir əlaqələrinə toxunaraq 20 illik dövr ərzində iki ölkə arasında 40-dan artıq sazişin imzalandığını, intensiv ikitərəfli səfərlərin təşkil olunduğunu və hazırda əməkdaşlıq sahələrinin genişlənərək neft, kənd təsərrüfatı, təhsil, turizm, informasiya texnologiyalarını və mədəni sahələri əhatə etdiyini diqqətə çatdırmış və əlaqələrin gələcək inkişaf perspektivlərindən danışmışdır.
Misirdəki Azərbaycan icmasının fəal üzvü və elmi tədqiqatçı, doktor Seymur Nəsirov, doktor-professor Səid Ətiya və doktor Hazem Səid Azərbaycan ilə Misir arasında diplomatik əlaqələrin qurulmasının 20 illik dövrü əhatə etməsinə baxmayaraq, bu münasibətlərin tarixinin qədim və erkən orta əsrlərə qədər gedib çıxdığını qeyd edərək ərəb mənbələrində Azərbaycan haqqında aşkar etdikləri bilgiləri bölüşmüşlər.
Bu xüsusda XI əsr ərəb alimi Əbu Tahir Əssiləfinin Azərbaycan ilə Əndəlüs arasında apardığı müqayisə və onun Şərqdə Azərbaycanın, Qərbdə isə Əndəlüsün elm və ədəbiyyatda xüsusi rolu barəsində söylədiyi fikirlər, XIII əsr ərəb alimi İmam Cəzərinin Azərbaycanın elmin hər bir sahəsində dahi alimlər yetişdirməsi barəsində qeydləri və ərəb alimi İbn Aşurun müqəddəs Qurani-Kərimdə cənnətdən bəhs olunarkən “Azərbaycan” adlı xalçaya eyham edildiyi barədə fikirləri tədbir iştirakçılarının nəzərinə çatdırılmışdır.
Eyni zamanda, ərəb mənbələrinə istinad olunaraq İslam dünyasının böyük sərkərdəsi Səlahəddin Əyyubinin Azərbaycandan olması barəsində faktlar qeyd edilmişdir.
“Əl-Məsəyə” qəzetinin redaktor müavini Məhəmməd Sələmə Ermənistan-Azərbaycan, Dağlıq Qarabağ münaqişəsindən danışaraq ermənilərin Azərbaycan xalqına qarşı törətdikləri vəhşiliklər və özünü ərəb-İslam dünyasının “dostu” adlandıran ermənilərin Azərbaycanın işğal olunmuş ərazilərində İslam mədəni irsini təhqirə və talana məruz qoymaları haqqında tədbir iştirakçılarına məlumat vermişdir. O, Misir ictimaiyyətini bu kimi hallara biganə qalmamağa çağırmışdır.
Konfransın sonunda Azərbaycanın siyasi, iqtisadi, sosial və mədəni sahələrdə tərəqqisi, ərəb dilində Ermənistan-Azərbaycan, Dağlıq Qarabağ münaqişəsindən bəhs edən film nümayiş olunmuşdur.
Bölmənin digər xəbərləri
