Siyasi şərhçi: Azərbaycan ədaləti öz gücü ilə bərpa etdi
Bakı, 6 fevral, Səbinə Əlizadə, AZƏRTAC
Ermənistan tərəfindən torpaqları işğal olunan Azərbaycan təxminən 30 il ərzində açıq-aşkar haqsızlıq və ədalətsizliklə üz-üzə qaldı. Münaqişənin həlli ilə bağlı beynəlxalq hüququn prinsipləri mövcud idi. BMT Təhlükəsizlik Şurasının dörd qətnaməsi, Baş Assambleyanın iki qətnaməsi, BMT Baş katibinin dəfələrlə verdiyi bəyanatlar, beynəlxalq platformalarda qəbul edilmiş sənədlər, ATƏT-in qərarları və digər mötəbər sübutlar açıq şəkildə göstərirdi ki, Azərbaycan işğala məruz qalıb və Ermənistan öz qoşunlarını işğal olunmuş ərazilərdən çıxarmalıdır. Lakin bütün bunlara baxmayaraq, beynəlxalq hüququn prinsipləri reallaşmadı, beynəlxalq ictimaiyyət və təşkilatlar bu ədalətsizliyə uzun illər səssiz qaldı.
Bu fikirləri AZƏRTAC-a açıqlamasında siyasi şərhçi Xəyal Bəşirov bildirib.
Onun sözlərinə görə, Azərbaycan münaqişə ilə bağlı bütün məsələlərin kompleks şəkildə həllinə nail olmağa çalışdı və buna tam şəkildə nail oldu. Bu gün yalnız sülh sazişinin imzalanması məsələsi qalıb.
Xəyal Bəşirovun sözlərinə görə, sülh sazişinin imzalanmasının qarşısında duran əsas maneə Ermənistan Konstitusiyasıdır: “Əgər bir dövlətin əsas qanununda sülh bağlanacaq ölkəyə qarşı ərazi iddiaları qalırsa, bu şəraitdə imzalanan sülh sənədi real nəticə verməyəcək. Azərbaycanın haqlı və prinsipial tələbi ondan ibarətdir ki, Ermənistan sülh sazişini imzalamaq istəyirsə, ilk növbədə öz Konstitusiyasını bu reallığa uyğunlaşdırmalıdır. Yalnız bundan sonra biz Ermənistanın Azərbaycana qarşı ərazi iddialarından tam imtina etdiyini qəbul edə və dayanıqlı sülhə nail ola bilərik”.
Siyasi şərhçi vurğulayıb ki, Azərbaycan 2023-cü ilin sentyabrında həyata keçirdiyi birgünlük antiterror tədbirləri ilə bütün ərazilərində tam suverenliyini təmin edib və bu proseslə paralel olaraq keçmiş münaqişə ilə bağlı ədalətsizlikləri və hüquqazidd məqamları aradan qaldırmaq üçün də ardıcıl addımlar atıb. Bu addımların ən mühümü isə Azərbaycan xalqına qarşı ağır cinayətlər törətmiş şəxslərin ədalət mühakiməsinə cəlb olunmasıdır: “Söhbət sülh və insanlıq əleyhinə cinayətlərdən, müharibə cinayətlərindən, təcavüzkar müharibənin aparılmasından, Azərbaycanın ərazi bütövlüyünün pozulmasından, terrorçuluqdan və digər ağır cinayətlərdən gedir. Bu cinayətlər dünyanın istənilən yerində ağır və məsuliyyət doğuran cinayətlər hesab olunur. Azərbaycan bu istiqamətdə unikal bir proses həyata keçirib. Araik Arutyunyan başda olmaqla, keçmiş qondarma rejimin rəhbərliyində təmsil olunan şəxslər Azərbaycan məhkəmələri tərəfindən mühakimə edildilər. Ədalət bərpa olundu”.
Xəyal Bəşirovun fikrincə, bu addımla Azərbaycan açıq mesaj verdi: Azərbaycan xalqına və dövlətinə qarşı törədilən heç bir cinayət cavabsız qalmayacaq. Bu proses təkcə Azərbaycan üçün deyil, digər dövlətlər və xalqlar üçün də nümunədir. Azərbaycan haqqın, ədalətin və hüququn yanında olduğunu bir daha nümayiş etdirdi. Cənubi Qafqazda həm tarixi, həm də ilahi ədalətin bərpası gələcəkdə bir çox ölkələr üçün presedent olacaq.
Bölmənin digər xəbərləri
