Milli Məclisin 2026-cı ilin payız sessiyasında ilk plenar iclası keçirilib YENİLƏNİB
Bakı, 30 sentyabr, AZƏRTAC
Sentyabrın 30-da Sahibə Qafarovanın sədrliyi ilə Milli Məclisin 2026-cı ilin payız sessiyasında ilk plenar iclası keçirilib. İclas Azərbaycan Respublikasının Dövlət Himninin səsləndirilməsi ilə başlayıb.
AZƏRTAC xəbər verir ki, Sahibə Qafarova payız sessiyasının başlaması münasibətilə deputatları təbrik edib. O bildirib ki, tətil dövründə qanunvericilik işinə fasilə verilsə də, parlamentin beynəlxalq fəaliyyəti davam edib. Bu müddətdə 27 deputat 14 xarici ölkəyə 32 səfər həyata keçirib, 4 beynəlxalq təşkilatın tədbirlərində iştirak edib, Qazaxıstan və Rusiyada keçirilən parlament seçkilərini müşahidə edib. Həmçinin 14 ölkənin və 4 beynəlxalq təşkilatın nümayəndə heyətləri, ümumilikdə 142 xarici qonaq Milli Məclisdə olub.
İclasın gündəliyinə 16 məsələ daxil edilib.
İlk olaraq 27 Sentyabr – Anım Günü ilə əlaqədar Milli Məclisin Bəyanatı müzakirəyə çıxarılıb. Sədr bildirib ki, 27 sentyabr xalqımız üçün xüsusi tarixi və mənəvi əhəmiyyət daşıyır. 44 günlük Vətən müharibəsində əldə edilən qələbə Azərbaycanın ərazi bütövlüyünün bərpasına, 2023-cü ilin sentyabrında keçirilən birgünlük antiterror əməliyyatı isə ölkənin suverenliyinin tam təmin olunmasına şərait yaradıb.
Bəyanatın mətnini parlamentin Xarici müdaxilələrə və hibrid təhdidlərə qarşı müvəqqəti komissiyasının sədri Ramid Namazov oxuyub və sənəd səsə qoyularaq qəbul edilib.
Daha sonra Milli Məclisin 2026-cı il payız sessiyasının qanunvericilik işləri planı müzakirə olunaraq təsdiqlənib.
İclasda, həmçinin “Azərbaycan Respublikasının İnsan hüquqları üzrə müvəkkili (ombudsman) haqqında” Konstitusiya Qanununda dəyişiklik edilməsi barədə qanun layihəsi ikinci səsvermədə qəbul olunub.
Azərbaycan Prezidenti tərəfindən Konstitusiyaya uyğun olaraq Milli Məclisə geri qaytarılan rəqəmsal texnologiyalar sahəsində fəaliyyət göstərən subyektlər üçün güzəşt və stimullar nəzərdə tutan qanun layihəsi də yenidən müzakirə edilib. Azərbaycan Prezidentinin köməkçisi, Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov sənədin təkmilləşdirildiyini bildirib. Qanun layihəsi səsə qoyularaq qəbul olunub.
Sonra bir sıra beynəlxalq sazişlərin təsdiqi ilə bağlı qanun layihələrinə baxılıb. Azərbaycan ilə İordaniya arasında ümumvətəndaş pasport sahiblərinin viza tələbindən qarşılıqlı azad edilməsi haqqında Saziş, “Cinayət işləri üzrə qarşılıqlı hüquqi yardım haqqında” Avropa Konvensiyasına İkinci Əlavə Protokol, Azərbaycan və Monqolustan arasında hava əlaqəsi haqqında Saziş, Azərbaycan və Ukrayna arasında hökumət rabitəsi sahəsində əməkdaşlığa dair Protokol, həmçinin Azərbaycan və Slovakiya arasında məxfi məlumatların mübadiləsi və qarşılıqlı mühafizəsi haqqında Saziş təsdiqlənib.
Daha sonra Quba-Xəzəryanı ərazisi üzrə kəşfiyyat, işlənmə və hasilatın pay bölgüsünə dair Sazişin qəbul və təsdiq edilməsi ilə bağlı qanun layihəsi müzakirə olunaraq qəbul edilib.
İclasda bir sıra qanun layihələri birinci oxunuşda da qəbul olunub. Bunlar arasında “Dövlət satınalmaları haqqında” Qanunda dəyişiklik, Cinayət və Cinayət-Prosessual məcəllələrində terrorizmin maliyyələşdirilməsinə qarşı mübarizənin gücləndirilməsi ilə bağlı dəyişikliklər, Dövlət Qulluğu Məcəlləsinin təsdiq edilməsi, həmçinin pensiya təminatı mexanizmlərinin təkmilləşdirilməsi ilə bağlı qanun layihələri yer alıb.
Dövlət Qulluğu Məcəlləsi layihəsində dövlət qulluğuna qəbul, vəzifəyə təyinat, rotasiya, xidməti fəaliyyətin qiymətləndirilməsi, vəzifədə irəliləyiş, əməkhaqqı, etik davranış və digər məsələlərin vahid məcəllə çərçivəsində tənzimlənməsi nəzərdə tutulur.
Pensiya islahatları ilə bağlı qanun layihəsində isə xüsusi şərtlərlə pensiya alan şəxslərin, hərbi qulluqçuların pensiya təminatının təkmilləşdirilməsi, pensiyaların və pensiya kapitallarının indeksləşdirilməsi mexanizminin yenilənməsi, həmçinin sosial sığorta ehtiyatının artırılması təklif edilir. Qanun layihəsi birinci oxunuşda qəbul olunub.
Bundan əlavə, hərbi qulluqçuların və xüsusi xidmət orqanlarında çalışan şəxslərin pul və maddi təminatı, pensiya hesablanması, eləcə də bəzi sosial təminat məsələləri ilə bağlı qanun layihəsi birinci oxunuşda qəbul edilib.
Gündəliyin sonuncu məsələsi olan “Sahibkarlıq sahəsində aparılan yoxlamaların dayandırılması haqqında” və “Ətraf mühitə təsirin qiymətləndirilməsi haqqında” qanunlarda dəyişiklik edilməsi barədə qanun layihəsi də ikinci oxunuşda qəbul olunub.
Bununla da Milli Məclisin 2026-cı ilin payız sessiyasında ilk plenar iclası başa çatıb.
Fotoqraf-Aydın Məmmədov
Bölmənin digər xəbərləri
