“MOLLA NƏSRƏDDİN” KİTABININ TƏQDİMATI KEÇİRİLMİŞDİR
Azərbaycan Milli Kitabxanasında gerçəkləşdirilən tədbirdə kitabxananın direktoru Kərim Tahirov, mədəniyyət və turizm nazirinin müavini Sevda Məmmədəliyeva, Azərbaycan Milli Elmlər Akademiyasının müxbir üzvü, Milli Məclisin deputatı Nizami Cəfərov, AMEA Nizami adına Ədəbiyyat İnstitutu direktorunun müavini, filologiya elmləri doktoru Teymur Kərimli və başqaları çıxış etmişlər.
Mərasimdə dövlətimizin başçısı İlham Əliyevin “Molla Nəsrəddin” jurnalının 100 illik yubileyi haqqında Sərəncamı ilə bağlı keçirilən tədbirlər çərçivəsində AMEA-nın Nizami adına Ədəbiyyat İnstitutunun hazırlayıb çap etdirdiyi III cild ətrafında fikir mübadiləsi aparılmışdır. Bildirilmişdir ki, çoxcildliyin işıq üzü görən növbəti kitabı jurnalın 1909-1910-cu il nömrələrini əhatə edir.
Jurnalın təkcə ölkəmizin deyil, eləcə də Yaxın və Orta Şərqin mədəni və ictimai-siyasi həyatında mühüm rol oynadığını vurğulayan natiqlər onu ədəbiyyatşünaslıq baxımından da təhlil etmişlər. Mərasimdə Mədəniyyət və Turizm Nazirliyinin qərarı ilə “Molla Nəsrəddin” kitabının işıq üzü görən cildlərinin bütün kütləvi kitabxanalara göndəriləcəyi də diqqətə çatdırılmışdır.
Tədbirdə belə bir inam ifadə edilmişdir ki, çoxcildliyin (10 cilddə) qalan nömrələri də yaxın bir-iki ildə oxuculara təqdim olunacaqdır.
Bölmənin digər xəbərləri
