“MOLLA NƏSRƏDDİN” VƏ “MOLLANƏSRƏDDİNÇİLƏR” KİTAB VƏ KARİKATURA SƏRGİSİ AÇILMIŞDIR
Sərgidə 100-ə qədər kitab, 50-dən yuxarı qəzet və jurnal materialı, Milli Kitabxanada qorunub saxlanılan “Kəlniyyət”, “Zənbur”, “Məzəli” jurnallarının nömrələri, 23 karikaturaçı rəssamın 60 əsəri nümayiş etdirilir.
Kitabxananın direktoru Kərim Tahirov “Molla Nəsrəddin” jurnalının 100 illik yubileyi çərçivəsində keçirilən tədbirin əhəmiyyətindən danışmışdır. Bildirmişdir ki, ölkəmizdə keçirilən silsilə tədbirlər bu jurnalın, onun yaradıcılarının, əməkdaşlarının təbliğində mühüm rol oynayır.
Mədəniyyət və turizm nazirinin müavini Sevda Məmmədəliyeva vurğulamışdır ki, Azərbaycanda karikaturaçı rəssamların yetişməsində “Molla Nəsrəddin”in əvəzsiz xidmətləri olmuşdur. Jurnalın dilimizin qorunub saxlanılmasında, xalqımızın maarifləndirilməsindəki müstəsna rolu da diqqətə çatdırılmışdır.
Tədbirdə tanınmış karikaturaçı rəssam Soltan Soltanlı “Molla Nəsrəddin”in təkcə ölkəmizdə deyil, Yaxın və Orta Şərqdə geniş şöhrət qazanmasında jurnalda çalışan karikaturaçı rəssamların da əməyini vurğulamışdır. Bildirilmişdir ki, bu gün ölkəmizdə 200-dən artıq karikaturaçı rəssam vardır. Onların bəziləri beynəlxalq müsabiqələrdə uğurla çıxış edir, mükafata layiq yerlər tuturlar. Bütün bunlar ölkəmizdə karikatura janrının əsasını qoyan ilk satirik jurnalın - “Molla Nəsrəddin”in nailiyyəti kimi dəyərləndirilmişdir.
Sərgi aprelin 20-dək davam edəcəkdir.
Bölmənin digər xəbərləri
