Bakı, 5 may, AZƏRTAC

Bakıda “Moskva-Bakı: iki paytaxtın dialoqu” mövzusunda konfrans keçirilib. Tədbir paytaxtlarımız arasında münasibətlərin inkişafına və möhkəmlənməsinə yönələn Bakıda Moskva Günləri çərçivəsində təşkil olunub.

AZƏRTAC xəbər verir ki, Rusiyanın Azərbaycandakı səfiri Mixail Boçarnikov Azərbaycan və Rusiya arasında əlaqələrin ali və yüksək səviyyələrdə intensivliyinin artdığını qeyd edib. O deyib: “Əmtəə dövriyyəmizin artımını qeyd etmək fərəhlidir. Azərbaycanın Dövlət Gömrük Komitəsinin məlumatına görə, 2022-ci ildə bu göstərici təxminən 24 faiz artımla 3,71 milyard dollara bərabər olub. Azərbaycan iqtisadiyyatına Rusiya investisiyalarının həcmində artım müşahidə olunur. Rusiya investisiyalarının ümumi toplanmış həcmi 6 milyard dolları üstələyir. O da maraq kəsb edir ki, hazırda Azərbaycanda Rusiyanın iştirakı ilə 1456 müəssisə qeydə alınıb”.

Mixail Boçarnikov “Şimal-Cənub” beynəlxalq nəqliyyat dəhlizi kimi iri regional layihələrə də toxunub. “Bu il martın 17-də Baş nazirlərin müavinləri Aleksey Overçuk və Şahin Mustafayevin iştirakı ilə “Xanoba” müasir sərhəd-keçid məntəqəsinin təntənəli açılışı olub ki, bu da yükdaşımaların həcminin artmasına şərait yaradacaq. 2022-ci ildə Bakı və Moskva arasında işə salınan aqroekspreslər - ərzaq daşınması üçün nəzərdə tutulan sürətli qatarlar da fasiləsiz logistikanın təminatına cavab verir. Biz Heydər Əliyevin Rusiya və Azərbaycan arasında münasibətlərin yaxşılaşmasına, genişlənməsinə və effektli olmasına yönələn siyasətini davam etdirmək üçün bundan sonra da əlimizdən gələni edəcəyik”, - deyə rusiyalı diplomat sözlərinə yekun vurub.

Moskva hökumətinin naziri, Moskva şəhərinin xarici iqtisadi və beynəlxalq əlaqələr departamentinin rəhbəri Sergey Çeremin qeyd edib ki, konfrans iki paytaxt arasında qarşılıqlı fəaliyyət məsələlərinə həsr olunub. O deyib: “Moskva Günləri Ümummilli Lider Heydər Əliyevin anadan olmasının 100 illiyinə həsr edilən tədbirlər palitrasına harmonik şəkildə əlavə edilib. O, müasir Azərbaycan quruculuğuna, o cümlədən sovet dövründə həyata keçirilən iri infrastruktur layihələrinin tikintisinə misilsiz töhfə verib. Heydər Əliyev uzun müddət Moskvada yaşayıb. Paytaxtlar arasında bu dialoqu indi də davam etdirmək bizim üçün çox mühümdür”.

Öz növbəsində, Bakı Şəhər İcra Hakimiyyəti aparatının rəhbəri Ayaz İmaməliyev vurğulayıb ki, ölkələrimiz arasında bu əməkdaşlıq formatı sistemli xarakter alır. “Hazırkı mürəkkəb dünyada qonşular arasında əməkdaşlıq mühüm əhəmiyyət daşıyır. Fərəhli haldır ki, bugünkü tədbir Azərbaycan xalqının Ümummilli Lideri Heydər Əliyevin anadan olmasının 100 illiyinin qeyd olunduğu ildə keçirilir. Ulu Öndərin səyləri sayəsində Azərbaycan və Rusiya arasında münasibətlər keyfiyyətcə yeni müstəviyə çıxıb. Bu siyasət Prezident İlham Əliyev tərəfindən uğurla davam etdirilir. Bizim səmimi münasibətlər, strateji tərəfdaşlıq, geniş məsələlər spektri üzrə qarşılıqlı fəaliyyətimiz iki paytaxt arasında əməkdaşlığın inkişafına istiqamətlənib. Bu konfrans əməkdaşlıq və qarşılıqlı anlaşmanın gələcəkdə də genişlənməsinə şərait yaradacaq. Biz təcrübə mübadiləsini davam etdiririk, Moskva və Bakı meriyaları arasında əməkdaşlıq dövlətlərarası münasibətlər çərçivəsində uğurla inkişaf edir.

Bakı regionun mühüm iqtisadi və mədəni mərkəzinə çevrilib. Hazırda Azərbaycan paytaxtında infrastruktur layihələri, o cümlədən şəhər sakinlərinin həyatı üçün rahat şəraitin yaradılmasına böyük töhfə vermiş “Bizim həyət” layihəsi icra olunur. Bu layihənin əsas məqsədi ekoloji təmiz həyətlərin rahatlığı və inkişafıdır. Bakıda bu layihə çərçivəsində 300 həyət abadlaşdırılıb. Azərbaycanda rus mədəniyyətinə, rus dilinə böyük hörmətlə yanaşılır və əhəmiyyətli maraq kəsb edir. Paytaxtda rus dilinin tədrisi üzrə ən iri mərkəzlərdən biri - Bakı Slavyan Universiteti fəaliyyət göstərir, 315 paytaxt məktəbinin 130-da rus dilində tədrisi həyata keçirən bölmə fəaliyyət göstərir. Şəhərin mərkəzində görkəmli rus şairi Aleksandr Puşkinin heykəli ucaldılıb. Eləcə də S.Vurğun adına Azərbaycan Dövlət Akademik Rus Dram Teatrı teatr həvəskarları arasında böyük populyarlıq qazanıb. Əminəm ki, Bakıda keçirilən Moskva Günləri və bugünkü konfrans ölkələrimiz arasında münasibətlərin inkişafına mühüm stimul verəcək”, - deyə A.İmaməliyev bildirib.

Moskva Şəhər Dumasının sədri Aleksey Şapoşnikov çıxışında qeyd edib ki, iki böyük şəhər - Moskva və Bakı yüz illər ərzində dostluq edir və qarşılıqlı fəaliyyət göstərirlər, bugünkü görüşümüz bunu təsdiqləyir. A.Şapoşnikov yeniliklər, smart-siti layihəsi, distansiyalı elektron səsvermə və s. barədə söhbət açıb.

Azərbaycan Respublikasının Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov vurğulayıb ki, kiçik və orta biznes sahəsində ölkələrimiz arasında tərəfdaşlığın artmasının və işgüzar biznes-missiya mübadiləsinin şahidi olmaq fərəhlidir. O deyib: “KOBIA tərəfindən bu istiqamətdə iş aparılır, ikitərəfli əməkdaşlığın genişlənməsi və gələcək inkişafı üçün şərait yaradılıb. Agentlik yarandığından bəri Rusiyanın müvafiq strukturları ilə əməkdaşlığın genişləndirilməsinə böyük əhəmiyyət verir. Biz Rusiyanın Kiçik və Orta Biznesin İnkişafı üzrə Federal Korporasiyası ilə sıx əlaqələr qurmuşuq və qarşılıqlı anlaşma haqqında ikitərəfli memorandum imzalamışıq.

Agentlik Rusiyanın ictimai birlikləri - “İşgüzar Rusiya” Ümumrusiya İctimai Təşkilatı, “Rusiyanın dayağı” kiçik və orta biznesin Ümumrusiya İctimai Təşkilatı və s. ilə fəal iş aparır. Sadalanan sənədlər sayəsində kiçik və orta müəssisələrə informasiya və marketinq dəstəyi üçün əməkdaşlıq platforması inkişaf edir”.

“Rusiya ixrac mərkəzi” Səhmdar Cəmiyyətinin Azərbaycandakı nümayəndəliyinin başçısı Nuri Quliyev qeyd edib ki, onların mərkəzi Rusiya və Azərbaycan arasında ticari-iqtisadi qarşılıqlı fəaliyyət mexanizminə dərin inteqrasiya edib. O deyib: “Biz illik əmtəə dövriyyəsinə öz kiçik töhfəmizi veririk: təxminən 500 milyon dollar. Bu, çox ağır işdir və azərbaycanlı dostlarımızın və federal hakimiyyət orqanlarının böyük dəstəyi olmadan mümkün deyildi. Cari tədbir çərçivəsində bizim tərəfimizdən Moskva şirkətləri ilə maraqlı danışıqlar aparıldı. Onların bəziləri ilə yüksəksəviyyəli görüşlərin keçirilməsinə nail olduq. Moskva ixrac mərkəzinin rəhbəri ilə məzmunlu söhbətimiz oldu, biz birgə irəliləyə biləcək oriyentir nöqtələri müəyyən etdik. Düşünürəm ki, çox maraqlı sinergiya olacaq və biz Moskva biznesini Azərbaycana inteqrasiya edə biləcəyik. Yeri gəlmişkən, Moskvada Kreativ Sənaye Agentliyi var, biz artıq həmkarlarla danışmışıq və Azərbaycanda maraq doğuran və tələbat yarana biləcək niş ərzaqlar üzrə birgə əməkdaşlıq istiqamətini müəyyən etmişik. Biz bu işi “Rossotrudniçestvo”nun Bakıdakı nümayəndələri ilə yerinə yetirəcəyik. Azərbaycanda Rusiya, əsasən Moskva şirkətləri üçün rüsumsuz ticarət, sadələşdirilmiş sertifikasiyadan tutmuş bu şirkətlərin Azərbaycan bazarında lokallaşdırılması üzrə əlverişli tədbirlərədək maksimum şərait yaradılıb və bu, hazırda hamı üçün çox aktualdır. Biz Moskva şirkətlərini tam dəstəkləməyə hazırıq”.

Panel sessiyadan sonra “Rahat şəhər mühitinin abadlaşdırılması və formalaşdırılması: Moskva və Bakının təcrübəsi” və “Kreativ sənayenin inkişafı Avrasiya qitəsində paytaxtların iqtisadi inkişafının amili kimi” mövzularında dəyirmi masalar təşkil olunub.