MƏDƏNİYYƏT
MOSKVADA GÖRKƏMLİ TARİXÇİ ƏHMƏD İSGƏNDƏROVUN 75 İLLİYİ QEYD EDİLMİŞDİR
Moskvada tanınmış tarixçi alim, SSRİ Elmlər Akademiyasının müxbir üzvü, “Voprosı istorii” jurnalının baş redaktoru, Ümumrusiya Azərbaycan Konqresi Mərkəzi Şurasının üzvü Əhməd Əhməd oğlu İsgəndərovun 75 illiyi təntənəli şəraitdə qeyd edilmişdir. Alimin dostları və həmkarları, Moskvadakı Azərbaycan diasporunun, Rusiya paytaxtı hökumətinin nümayəndələri, Ümumrusiya Azərbaycan Konqresinin üzvləri soydaşımızı təbrik etməyə gəlmişdilər.
Azərbaycan Respublikasının Rusiyadakı fövqəladə və səlahiyyətli səfiri Ramiz Rizayev yubilyarı təbrik edərək, ona ən yaxşı arzularını bildirdi. Səfir dedi ki, Ə.İsgəndərov dövrümüzün görkəmli alimidir və onun yubileyi bütün Azərbaycan xalqının bayramıdır. Ramiz Rizayev Azərbaycan Respublikasının Prezidenti Heydər Əliyevin alimə təbrik məktubunu oxudu. Azərbaycan dövlətinin başçısı məktubunda bu görkəmli alimin çoxillik səmərəli fəaliyyətini yüksək qiymətləndirmiş və ona yeni uğurlar, firavanlıq arzulamışdır.
Xatırladaq ki, Əhməd İsgəndərov 40 ildir elmi fəaliyyətlə məşğul olur, 200-dən çox əsərin, o cümlədən Yaponiyanın tarixi və mədəniyyətinə, Rusiya tarixinə, Şərq ölkələrində milli azadlıq hərəkatına, tarixin metodologiyasına, tarixşünaslığa dair 8 monoqrafiyanın müəllifidir. Ə.İsgəndərov elmi fəaliyyəti illərində SSRİ Elmlər Akademiyasının Şərqşünaslıq İnstitutunda işləmiş, Praqada nəşr edilmiş “Problemı mira i sosializma” jurnalının şöbə müdiri, SSRİ EA-nın Beynəlxalq Fəhlə Hərəkatı İnstitutu direktorunun və Ümumi Tarix İnstitutu direktorunun müavini olmuşdur. 1987-ci ildən isə “Voprosı istorii” jurnalının baş redaktorudur.
Asya Hacızadə
AZƏRTAC-ın xüsusi müxbiri
Moskva