MOSKVADA MDB ÖLKƏLƏRİ YARADICI VƏ ELMİ ZİYALILARININ BİRİNCİ FORUMU KEÇİRİLMİŞDİR

15.04.2006 [21:06]
Çap et
A⁺ A^-

AZƏRTAC-ın xüsusi müxbiri xəbər verir ki, aprelin 14-15-də M.V.Lomonosov adına Moskva Dövlət Universitetində (MDU) MDB ölkələri yaradıcı və elmi ziyalılarının birinci forumu keçirilmişdir. Tədbirə Birlik ölkələrinin 300-dən çox nümayəndəsi, 100 fəxri qonaq və rəsmi şəxs, habelə müxtəlif regionların 250 təmsilçisi toplaşmışdı. Azərbaycanı forumda Milli Məclisin deputatı Səməd Seyidovun başçılığı ilə yaradıcı ziyalılardan ibarət nümayəndə heyəti təmsil etmişdir. Nümayəndə heyətinə Yazıçılar Birliyinin katibi Çingiz Abdullayev, Rəssamlar İttifaqının sədri Fərhad Xəlilov, Rəssamlıq Akademiyasının professoru Leyla Axundzadə, Ədəbiyyat Fondunun baş direktoru Nazim İbrahimov, Bəstəkarlar İttifaqının məsul katibi Lalə Hüseynova və respublika ali məktəblərinin və mədəni-maarif müəssisələrinin tanınmış təmsilçiləri daxil idilər.

Bu, son 10 ildə ilk belə irimiqyaslı tədbir idi. Forumun əsas mövzusu MDB çərçivəsində humanitar sahədə əməkdaşlığı keyfiyyətcə yeniləşdirmək, keçmiş sovet respublikalarının ziyalıları arasında dialoqu bərpa etməkdir.

Forumda Rusiya Prezidenti Vladimir Putin, MDU-nun rektoru akademik Viktor Sadovniçi, Azərbaycanın Moskvadakı səfiri Polad Bülbüloğlu, Kinematoqrafçılar İttifaqları Konfederasiyasının sədri, xalq yazıçısı Rüstəm İbrahimbəyov, Qazaxıstanın YUNESKO-da daimi nümayəndəsi Oljas Süleymenov və Birlik ölkələrinin yaradıcı ziyalılarının görkəmli nümayəndələri də iştirak etmişlər.

Bu nüfuzlu yığıncaqda dünyada müasir tələblər nəzərə alınmaqla təhsil və bu sahəyə reinteqrasiyanın yeni imkanları, MDB ölkələrinin milli inkişafından və birgə mənafelərindən irəli gələn vəzifələr müzakirəyə çıxarılmışdır. MDB-də keyfiyyətcə yeni təhsil məkanının yaradılması, təhsilin keyfiyyətinin və hazırlanan mütəxəssislərin peşə səviyyəsinin qiymətləndirilməsinə vahid yanaşma, tələbə, gənclər və akademik mübadilələrinin genişləndirilməsi, istedadlı gənclərin dəstəklənməsi, müasir tədris metodikalarının tətbiqi və ixtisasartırma məsələləri diqqət mərkəzində olmuşdur. Elm, elmi texnologiyalar sahəsində inteqrasiyanın dərinləşdirilməsinin əsas istiqamətləri, mədəni irsin qorunması məsələləri də nəzərdən keçirilmişdir.

Forumda MDB məkanında humanitar, elmi və mədəni əməkdaşlığı dəstəkləmək və ona kömək məqsədi ilə YUNESKO tipli beynəlxalq humanitar əməkdaşlıq fondu yaradılması barədə təklif irəli sürülmüşdür.

Növbəti forumu 2007-ci ildə Qazaxıstanın paytaxtı Astanada keçirmək qərara alınmışdır.