MÜNAQİŞƏ ZONALARINDA HƏLAK OLAN JURNALİSTLƏRİN SAYI AZALMIŞDIR
AZƏRTAC-ın xüsusi müxbiri Jurnalistlərin Müdafiə Təşkilatının Cenevrədə yaydığı məlumata istinadla xəbər verir ki, 2008-ci ilin 6 ayında ötən ilin müvafiq dövrü ilə müqayisədə münaqişə zonalarında həlak olan jurnalistlərin sayı 37 faiz azalmışdır.
Məlumatda bildirilir ki, ötən ilin müvafiq dövründə öz peşə borcunu yerinə yetirərkən 76 jurnalist qətlə yetirilmişdisə, cari ilin ilk yarım ilində onların sayı 48 olmuşdur. Təkcə iyul ayında Kambocada 3, İraq və Zimbabvenin hərəsində 1 media nümayəndəsi öldürülmüşdür.
Təşkilat həlak olmuş jurnalistlərin sayının az olmasını bəzi münaqişə zonalarında gərginliyin azalması ilə əlaqələndirmişdir.
Son 6 ayda Meksikada 5, Pakistanda 5, Rusiya, Hindistan, Kolumbiya, Venesuela, Filippin, Əfqanıstan və Somali kimi ölkələrin hər birində 2 jurnalistin öldürüldüyü qeyd edilmişdir.
Bölmənin digər xəbərləri
