Murmanskda Anım və Hüzn Günü qeyd edilmişdir
Bakı, 22 iyun (AZƏRTAC). Rusiyanın hər yerində Anım və Hüzn Günü qeyd edilmişdir. Qəhrəman Murmansk şəhərində də həlak olmuş döyüşçülərə ucaldılmış əsas abidələrin qarşısında tədbirlər keçirilmişdir.
Murmanskda Anım və Hüzn Günü ilə əlaqədar iclas olmuşdur. Tədbirə bütün diaspor təşkilatlarının rəhbərləri dəvət olunmuşlar. Onlar qeyd etmişlər ki, Böyük Vətən müharibəsində sovet xalqının Qələbəsi təqribən 27 milyon nəfərin həyatı bahasına başa gəlmişdir. Bu dəhşətli müharibədə minlərlə şimallı - Qızıl Ordunun döyüşçüləri, Şimal donanmasının dənizçiləri, sərhədçilər, cəbhəyanı Murmansk bölgəsinin əməkçiləri həlak olmuşlar. Onlar həyatları bahasına düşməni Kola yarımadasının “kandarından” geri qaytarmışlar. Bu insanların qəhrəmanlığı və fədakarlığı sayəsində Kola torpağı işğalın dəhşətlərini və təhqirlərini görməmiş, bütün müharibə dövründə Qələbə naminə gərgin işləməkdə davam etmişdir.
Tədbirdə vilayətin İctimai Palatasının üzvü, Ümumrusiya Azərbaycanlılar Konqresinin (ÜAK) Murmansk Regional Şöbəsinin sədri Afil Hüseynov nitq söyləmişdir. O demişdir ki, çoxsaylı SSRİ xalqlarının milyonlarla oğul və qızı müharibə yollarını keçmişdir. Onların arasında Azərbaycanın 600 mindən çox döyüşçüsü olmuşdur. Azərbaycan xalqı döyüşlərdə şücaət nümunələri göstərməklə yanaşı arxa cəbhədə də öz fədakar əməyi ilə ümumi qələbəyə sanballı töhfə vermişdir.
Azərbaycanın hər beş sakinindən biri əlinə silah alıb Böyük Vətən müharibəsi cəbhələrində vuruşmuşdur. Demək olar ki, hər bir ailə Vətəni qorumaq üçün oğul və qızlarını cəbhəyə göndərmişdir. Ölkə əhalisinin sayı 3,4 milyon nəfər olduğu halda (1941-ci ildə), cəbhəyə 10 min nəfərdən çox qadın getmişdi. Azərbaycanlılar Brest qalası yaxınlığında, mühasirədə olan Leninqradda, Moskva, Stalinqrad yaxınlığında, Kursk qövsündə qəhrəmanlıqla vuruşmuş, Qafqazı qorumuş, Ukraynanı, Rusiyanı, Belarusu, Şərqi Avropa ölkələrini azad etmişlər. Berlin yaxınlığında döyüşlərin iştirakçıları arasında Azərbaycanın igid qızları da olmuşdur. Müharibə illərində cəbhənin neft və neft məhsulları ilə əsas təchizatçısı Azərbaycan olmuşdur. Azərbaycan neftçiləri bütün ölkənin verdiyi yanacağın 80 faizə qədərini istehsal edirdi və müharibənin təkcə birinci ilində ölkəyə 23,5 milyon ton neft vermişdi. Bakı neftinin 75 milyon tonundan çoxu hərbi ehtiyaclar üçün cəbhəyə göndərilirdi. Azərbaycanda 130 növdən çox silah və döyüş sursatı istehsal olunurdu. Vətəndaşlarımız 15 kiloqram qızıl, 952 kiloqram gümüş, 320 milyon rubl nağd pul toplayıb müdafiə fonduna təhvil vermişdilər. Rəsmi məlumata görə, Azərbaycan həkimləri 1,5 milyon hərbi qulluqçunu döyüş sıralarına qaytarmışlar. Onların bir qismi müharibədən sonra öz taleyini həmişəlik Azərbaycanla bağlamışdır. Azərbaycan ərazisində 87 batalyon, 1123 özünümüdafiə dəstəsi yaradılmış, 77-ci, 223-cü, 402-ci və 416-cı milli atıcı diviziyaları formalaşdırılmışdır. Onlar Qafqaz dağlarının ətəklərindən Pribaltikaya, Şərqi Avropaya və Berlinədək döyüş yolu keçmişlər. Böyük Vətən müharibəsində qəhrəmanlıq və igidlik göstərdiklərinə görə Azərbaycanın 170 mindən çox döyüşçüsü orden və medallarla təltif edilmiş, 123 nəfər isə Sovet İttifaqı Qəhrəmanı adına layiq görülmüşdür. Azərbaycan xalqı faşizm üzərində qələbə qazanılmasına çox böyük töhfə vermişdir.
İyunun 21-də Murmanskdakı Şöhrət vadisində mitinq keçirilmiş, Memorial kompleksin önünə əklillər və çiçək dəstələri düzülmüşdür.
ÜAK-ın Murmansk Regional Şöbəsinin mətbuat xidmətinin rəhbəri Əlihüseyn Şükürov AZƏRTAC-ın müxbirinə demişdir: “Qeyd edək ki, həmvətənlərimiz, təşkilatımızın fəalları anım tədbirlərindən kənarda qalmayacaqlar”.
Şəhərdə ənənəvi “Unutmamışıq” aksiyası keçiriləcəkdir. Mədəniyyət sarayının əməkdaşları, “Cəbhəçi” klubunun veteranları, yay sağlamlıq düşərgələrindəki məktəblilər və arzu edən bütün insanlar ağac əkəcək, səmaya kağız göyərçinlər buraxacaqlar.
Bölmənin digər xəbərləri
