Musiqili Teatr mövsümün ən yaxşılarını mükafatlandıracaq
Bakı, 28 iyun, AZƏRTAC
Azərbaycan Dövlət Musiqili Teatrının 108-ci mövsümü yekunlaşmaq üzrədir.
Qurumun mətbuat xidmətindən AZƏRTAC-a bildirilib ki, mövsümün başa çatması ilə əlaqədar iyulun 3-də sənət ocağında mükafatlandırma mərasimi olacaq. Artıq bir neçə ildir ki, kollektivdə yaradıcılıq fəaliyyəti və əməyi ilə seçilən əməkdaşların mövsümün sonunda mükafatlandırılması ənənəyə çevrilib.
Tədbirdə “Ən yaxşı kişi roluna görə”, “Ən yaxşı qadın roluna görə”, “Mövsümün ən yaxşı rejissor işinə görə”, “Mövsümün sevilən aktrisası”, “Mövsümün sevilən aktyoru”, “Mövsümün məhsuldar aktyoru”, “Bərpa tamaşasında uğurlu roluna görə”, “Mövsümün ən yaxşı balet artisti”, “Mövsümün ən yaxşı xor artisti”, “Mövsümün ən yaxşı musiqiçisi”, “Mövsümün ən işgüzar əməkdaşı”, “Mövsümün ən yaxşı uşaq roluna görə”, “Teatrın dostu”, “Mövsümün ən yaxşı texniki işçisi”, “Mövsümün sevilən tamaşası” nominasiyaları üzrə qaliblər bəlli olacaq. Qaliblərə xüsusi prizlər və pul mükafatları veriləcək.
Mərasimdə, həmçinin mövsümün seçilən aktyorlarına Xalq Artisti Hüseynağa Sadıqovun ailəsinin təsis etdiyi “Büllur alma” mükafatı təqdim olunacaq.
Bölmənin digər xəbərləri
