MƏDƏNİYYƏT
Musiqili Teatr tamaşaçılarına sorğu ünvanlayıb
Bakı, 8 may, AZƏRTAC
Azərbaycan Dövlət Akademik Musiqili Teatrı rəsmi sosial şəbəkə hesablarından virtual izləyicilərinə maraqlı sorğu ünvanlayıb.
Teatrın mətbuat xidmətindən AZƏRTAC-a bildirilib ki, belə bir sorğunun yaranmasına səbəb isə karantin günlərində teatrın virtual izləyicilərinin sayının gündən - günə artması və bu qocaman sənət məbədinə onların hədsiz marağıdır.
Elə bu baxımdan da, teatr hər dəfə izləyicilərin istək və arzularını nəzərə alaraq, repertuarında xüsusi yeri olan maraqlı nümunələri, eyni zamanda xalqın sevdiyi retro tamaşaları “Facebook” səhifəsində canlı yayım vasitəsilə təqdim edir. Bu, mövcud vəziyyətdə teatr və tamaşaçı arasında əlaqə yaratmaq üçün ən yaxşı vasitə olsa da, təbii ki, heç nə canlı ünsiyyəti əvəz edə bilməz.
Tamaşaçıların teatra böyük sevgisi yaradıcı kollektivi belə bir sorğu ilə onlara müraciət etməyə sövq edib. Belə ki, sual və cavab bəndləri link vasitəsilə aşağıdakı qaydada göstərilib: Teatr iyul və avqust aylarında fəaliyyət göstərərsə, tamaşalarda iştirak etmək istərdinizmi?
Sorğuda iştirak edənlər öz variantlarını, eyni zamanda şərh bölməsində yaza bilərlər.
Beləliklə, Akademik Musiqili Teatr sorğuda iştirak etmək üçün hamınızı göstərilən linkə daxil olaraq öz münasibətinizi bildirməyə dəvət edir.