CƏMİYYƏT
Nadir Adilov: Mobil və rəqəmsal mediasiya quruculuğunda Ədliyyə Nazirliyinin təcrübəsi öyrənilərək tətbiq ediləcək
Bakı, 9 sentyabr, AZƏRTAC
Mobil və rəqəmsal mediasiya quruculuğunda Ədliyyə Nazirliyinin mobil tətbiqlər üzrə mütərəqqi təcrübəsi öyrənilərək tətbiq ediləcək.
AZƏRTAC xəbər verir ki, bunu Ədliyyə Nazirliyi tərəfindən təqdimat mərasimi keçirilən “E-qanun” mobil tətbiqinin müzakirəsinə həsr edilmiş tədbirdə Mediasiya Şurası İdarə Heyətinin sədri Nadir Adilov deyib.
Mediasiya Şurası vətəndaş məmnunluğunun təmin edilməsi sahəsində rəqəmsal təcrübəni öyrəndiyini və yaxın zamanlarda bunu tətbiq etməyi planlaşdırdığını söyləyən İdarə Heyətinin sədri deyib: “BP şirkəti ilə səmərəli əməkdaşlığımız nəticəsində mediasiya proseslərinin avtomatlaşdırılması, rəqəmsallaşdırılması ilə bağlı Mediasiya Şurası tərəfindən layihə icra ediləcək. BP şirkətinin bizə verdiyi dəstək nəticəsində biz bir çox texniki və proqramlaşdırma yönümlü məsələləri həll edə biləcəyik. BP tərəfindən göstərilmiş layihənin uğurla icra edilməsi sahəsində isə biz Mediasiya Şurası olaraq mütərəqqi təcrübəni öyrənərək tətbiq etməliyik. Bu mütərəqqi təcrübənin isə bizə ən yaxını Ədliyyə Nazirliyi tərəfindən hazırlanaraq tətbiq edilən mobil tətbiqlərdir. Nazirliyin bu sahədə təcrübəsini öyrənmək və tətbiq etməklə bağlı niyyətimizə çox müsbət yanaşılıb və hətta bizə bu sahədə zəruri metodiki və məsləhət dəstəyi də təmənnasız olaraq göstərilib”.
Onun sözlərinə görə, Ədliyyə Nazirliyi mobil tətbiqlər üzrə bir çox işlər görüb: “Vahid məhkəmə portalı, mobil notariat, sahibkarlıq sahəsində aparılan yoxlamaların vahid məlumat reyestri, normativ hüquqi aktların vahid internet elektron bazası, icra xidməti və s. rəqəmsal mediasiya üçün gözəl bir nümunədir. Əgər biz mobil mediasiya və yaxud da rəqəmsal mediasiyaya bir startap kimi baxsaq, bu startapın ölkəmizdə bazasını təşkil edən elektron resurslar Ədliyyə Nazirliyi tərəfindən yaradılıb. Dünyada da belədir, əgər bir ideya, bir startap yaranırsa, onun uğurlu tətbiqi üçün mütləq bu startapı dəstəkləyən rəqəmsal ekosistem olmalıdır. Bizim uğurumuz isə ondadır ki, bu ekosistem Ədliyyə Nazirliyi tərəfindən hazırlanıb və illərdir ki, üzərində təkminləşdirmə işləri gedir”.
N.Adilov qeyd edib ki, ölkəmizdə mediasiyanın rəqəmsallaşması və avtomatlaşdırılması üzrə mühitə təsir edən baza işləri daha güclüdür. “Mediasiyanı rəqəmsallaşdırılması üçün artıq zəruri olan bir çox bazalar, mobil mediasiya tətbiqini dəstəkləyəcək rəqəmsal həllər var. Bu tətbiqlərin proqramlaşdırma xüsusiyyətləri, onların sınaqdan keçirilərək uğurlu alınması sahəsində Ədliyyə Nazirliyi işlər görülüb. Bizim üzərimizə düşən isə Mediasiya platformasını qısa zaman ərzində həm fiziki şəxslər, həm də hüquqi şəxslər üçün istifadəçi yönümlü etməkdir. Mediasiya işlərinin rəqəmsallaşdırılması istifadəçilər üçün rahatlıqdan əlavə statistikaların daha dəqiq aparılmasına, mediator və təşkilat arasında iş prosesinin əlverişli təşkilinə və mediatorlarının işlərinin elektron sistem üzərindən optimallaşdırılmasını təmin edəcək”, - deyə İdarə Heyətinin sədri vurğulayıb.