“Nağı Nağıyev: taleyi və sənəti” kitabının təqdimatı keçirilib
Naxçıvan, 29 yanvar, AZƏRTAC
AMEA Naxçıvan Bölməsində görkəmli ictimai xadim, yazıçı, dramaturq, tərcüməçi, redaktor, rəssam, pedaqoq Nağı Nağıyevə həsr olunmuş “Nağı Nağıyev: taleyi və sənəti” kitabının təqdimatı keçirilib.
Akademiyanın Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, tədbirdə çıxış edən bölmənin sədri, akademik İsmayıl Hacıyev kitabın elmi əhəmiyyətini qeyd edib. Vurğulanıb ki, 2007-ci ildən başlayaraq İncəsənət, Dil və Ədəbiyyat İnstitutunun Ədəbiyyatşünaslıq şöbəsi tərəfindən “Taleyi və sənəti” seriyası üzrə kitabların nəşri artıq ənənə halı alıb. “Nağı Nağıyev: taleyi və sənəti” kitabı da həmin seriya çərçivəsində nəşr olunan sayca 14-cü kitabdır. Naxçıvan Muxtar Respublikası Ali Məclisinin Sədri yanında Bilik Fondunun dəstəyi ilə işıq üzü görən kitab “Əcəmi” Nəşriyyat Poliqrafiya Birliyində çap edilib. Kitabın elmi redaktoru AMEA-nın müxbir üzvü, professor Əbülfəz Quliyevdir.
Akademik görkəmli nasirin çoxşaxəli fəaliyyətindən bəhs edərək deyib ki, Nağı Nağıyev, eyni zamanda, tərcüməçi və redaktor kimi də uğurlu fəaliyyət göstərib. Onun məhsuldar fəaliyyəti nəticəsində dünya ədəbiyyatının bir neçə incisi Azərbaycan oxucusuna təqdim edilib, ədəbiyyatımız daha da zənginləşib.
AMEA-nın müxbir üzvü, professor Əbülfəz Quliyev çıxışında Nağı Nağıyevin həyatı və yaradıcılığı haqqında ətraflı məlumat verib. Bildirib ki, Naxçıvan ədəbi mühitinin görkəmli nümayəndələrindən biri olan Nağı Nağıyev nasir, tərcüməçi, redaktor, rəssam olmaqla yanaşı, eyni zamanda, bir pedaqoq kimi də fəaliyyət göstərib, vətənpərvərliyi, doğma torpağa sədaqəti öz timsalında gənc nəslə aşılayıb. Alim yazıçının yaradıcılığının Naxçıvan və Bakı dövrləri haqqında ətraflı məlumat verərək diqqətə çatdırıb ki, ötən əsrin ortalarında Naxçıvana qarşı ögey münasibət Nağı Nağıyevin fəaliyyətinə də təsir edib, o, yalnız Bakıda yaşadığı dövrdə əsərlərinin nəşrinə müvəffəq olub.
Yazıçının yaradıcılığına göstərilən dövlət qayğısından bəhs edən alim bildirib ki, kitabda Nağı Nağıyevin həyatının bütün dövrləri tədqiqata cəlb olunub, çoxşaxəli yaradıcılığının ən incə məqamları işıqlandırılıb. Nəşrdə Naxçıvan Bölməsinin İncəsənət, Dil və Ədəbiyyat İnstitutu əməkdaşlarının Nağı Nağıyevə həsr olunmuş 12 məqaləsi verilib, onun həyatı, yaradıcılığının üslub xüsusiyyətləri, hekayələri, povestləri, dramaturgiyası, Naxçıvan teatrındakı fəaliyyəti və digər məsələlərlə tədqiq edilib. Kitabda “Müasirləri Nağı Nağıyev haqqında” adlı başlıqda Süleyman Rəhimovun “Zəhmətkeş yazıçı”, Cavad Cavadlının “Ədibin xatirəsi”, Sevda Əlibəylinin “Pedaqoq, nasir, dramaturq, rəssam, ictimai xadim” adlı yazıları və başqa tanınmış insanların onunla bağlı mətbuatda dərc edilən məqalələri oxuculara təqdim olunub. Kitabın “Nağı Nağıyev xatirələrdə” başlığı altında yazıçının oğlu, Azərbaycanın Əməkdar mühəndisi Vasif Nağıyevin “Atamdan qalan xatirələr” adlı yazısı oxuculara təqdim edilib, sonda yazıçının həyatının müxtəlif dövrlərində çəkilmiş fotoşəkilləri və kitablarının şəkilləri verilib.
Yazıçının ailə üzvləri də tədbirdə onlayn iştirak edərək onun haqqında fikirlərini, xatirələrini yığıncaq iştirakçıları ilə bölüşüblər.
Təqdimat mərasimində Bakı şəhər 102 saylı orta məktəbin müəllimi, filologiya üzrə fəlsəfə doktoru Mələk Süleymanovanın, Naxçıvan Bölməsinin İncəsənət, Dil və Ədəbiyyat İnstitutunun şöbə müdiri, filologiya üzrə fəlsəfə doktoru, dosent Ramiz Qasımovun və Bakı Dövlət Universitetinin müəllimi, filologiya üzrə fəlsəfə doktoru Yeganə Qəhrəmanlının çıxışları dinlənilib. Çıxış edənlər bildiriblər ki, Nağı Nağıyev yaradıcılığında insan sevgisi ön plandadır. Əsərlərində insanları daim saflığa, düzlüyə səsləyən yazıçı oxuculara özünütənqid hissi aşılayır. Onun yaradıcılıq nümunələrində mənfi personajları islah yoluna yönəltməsi də həmin sevginin təzahürüdür.
Sonda yazıçının nəvələri Mələk Süleymanova və Yeganə Qəhrəmanlı Nağı Nağıyev ədəbi irsinə göstərilən diqqət və ehtirama görə Naxçıvan Muxtar Respublikası Ali Məclisinin sədrinə minnətdarlıqlarını bildiriblər.
Bölmənin digər xəbərləri
