“Napoli”nin çempionluğunun qeyd olunduğu şənliklər ölümlə nəticələnib
Roma, 5 may, AZƏRTAC
“Napoli” klubunun İtaliya A seriyasında çempionluğunun qeyd olunduğu şənliklər zamanı bir nəfər ölüb, 5 nəfər yaralanıb.
AZƏRTAC xəbər verir ki, gecə saatlarında Neapol şəhərinin mərkəzi küçəsində 26 yaşlı Vinçenzo Kostanso güllə ilə vurularaq öldürülüb. Onun şənlik zamanı təsadüfi atəş nəticəsində, yoxsa məqsədyönlü şəkildə güllələndiyi hələlik məlum deyil. Hadisə nəticəsində daha 3 nəfər yaralanıb.
Hüquq-mühafizə orqanları faktla bağlı istintaqa başlayıb, hadisənin səbəbləri araşdırılır.
Neapolun mərkəzi meydanlarında və küçələrində keçirilən şənliklərdə isə iki nəfər fişəng partlaması nəticəsində yaralanıb.
Qeyd edək ki, “Napoli” 33 illik aradan sonra A seriyasının qalibi olub və bu çempionluq Neapolda böyük coşqu ilə qeyd edilir.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
