NARKOTİKLƏRƏ NƏZARƏT ÜZRƏ REGİONAL ƏMƏKDAŞLIĞADAİR ANLAŞMA MEMORANDUMUNUN ÜZV TƏRƏFLƏRİNİNBEŞİNCİ GÖRÜŞÜNÜN İŞTİRAKÇILARINA
Narkotiklərə nəzarət üzrə regional əməkdaşlığa dair Anlaşma Memorandumunun üzv Tərəflərinin Beşinci görüşünün iştirakçılarını salamlayaraq, ümidvar olduğumu bildirirəm ki, Bakı şəhərində keçirilən bu görüş narkotik vasitələrin qanunsuz dövriyyəsinə qarşı mübarizədə mühüm mərhələ olacaqdır.
Müasir inkişaf dövrü narkotiklərin qanunsuz dövriyyəsinin qloballaşması ilə səciyyələnir. Belə ki, dünyada geniş vüsət almış iqtisadi inteqrasiya, ticarət və nəqliyyat əlaqələrinin genişlənməsi prosesləri dünyanın bəzi regionlarında istehsal edilən narkotik vasitələrin digər ölkələrə yayılması ilə müşayiət olunur. Bu da öz növbəsində hər bir ölkənin sosial-iqtisadi inkişafına mənfi təsir göstərir. İnsanların həyat və sağlamlığına ciddi təhlükə yaradır, cinayətkarlığın, zorakılığın artmasına səbəb olur, insan cəmiyyətinin mənəvi dəyərlərinə böyük zərbə vurur.
Narkotik vasitələrin qanunsuz dövriyyəsinin bəşəriyyət üçün təhlükəliliyi milli, eləcə də beynəlxalq səviyyədə müvafiq nəzarət sisteminin tətbiq edilməsini zəruri edir.
Lakin dünyanın bəzi bölgələrində hələ də davam edən hərbi münaqişələr və onların nəticəsində formalaşmış işğalçı rejimlər hakimiyyət orqanlarının və beynəlxalq təşkilatların nəzarət edə bilmədiyi ərazilərdə narkotik bitkilərin əkilib-becərilməsinə, narkotiklərin istehsalına, onların qanunsuz dövriyyəsinə və digər cinayətkarlıq yuvalarının yaranmasına gətirib çıxarmış və bu fəaliyyətdən əldə edilən milyardlarla gəlir beynəlxalq terrorçuluğun maliyyələşdirilməsinə yönəldilir.
İşğalçı rejimlər beynəlxalq hüququn prinsip və normalarını, demokratik dəyərləri və insan hüquqlarını kobudcasına pozaraq, yalnız öz əhalisi üçün deyil, həm də beynəlxalq sülhə və əmin-amanlığa real təhlükə yaratmaqdadırlar. Ermənistan tərəfindən Azərbaycan torpaqlarının işğalı nəticəsində ölkəmizin Dağlıq Qarabağ bölgəsində yaradılmış terrorçu rejim buna əyani sübutdur.
Narkotik vasitələrin qanunsuz dövriyyəsinə qarşı mübarizəni ümumdövlət vəzifəsi hesab edən Azərbaycan Respublikası beynəlxalq birliyin bütün səylərini dəstəkləyərək, Birləşmiş Millətlər Təşkilatının müvafiq konvensiyalarına qoşulmuş, ölkəmizdə beynəlxalq standartlara uyğun normativ-hüquqi baza yaradılmışdır.
Bu mübarizədə cinayət hüququ xarakterli tədbirlərlə yanaşı, cəmiyyətimizdə sağlam sosial bünövrənin daha da möhkəmləndirilməsi istiqamətində zəruri kompleks tədbirlər həyata keçirilmişdir. Biz gələcəkdə də narkotiklərə qarşı qətiyyətli və güzəştsiz mübarizə aparacağıq.
Əminəm ki, Narkotiklərə nəzarət üzrə regional əməkdaşlığa dair Anlaşma Memorandumunun üzv Tərəflərinin Beşinci görüşü narkomanlığa və narkotiklərin qanunsuz dövriyyəsinə qarşı mübarizədə öz dəyərli töhfəsini verəcək, beynəlxalq birliyin qəti iradəsini bir daha nümayiş etdirərək, səylərimizi səfərbər edəcəkdir.
Məqsəd və məramlarınızın həyata keçirilməsində, ölkələrimiz arasında yaranmış qarşılıqlı əlaqələrin inkişafına yönəlmiş fəaliyyətinizdə Sizə uğurlar arzulayıram.
İlham Əliyev,
Azərbaycan Respublikasının Prezidenti.
Bakı şəhəri, 2 dekabr 2003-cü il.
Bölmənin digər xəbərləri
