“NATƏVAN”IN İLK YARADICILIQ İŞLƏRİ BAŞLANMIŞDIR
Azpərbaycan Dövlət Opera və Balet Teatrında görkəmli bəstəkar, xalq artisti, Dövlət mükafatı laureatı, professor Vasif Adıgözəlovun “Natəvan” operası üzərində yaradıcılıq işlərinə başlanılmışdır.
Teatrdan AZƏRTAC-ın müxbirinə demişlər ki, məşhur Azərbaycan şairəsi Xurşidbanu Natəvanın anadan olmasının 170 illiyinə həsr edilmiş operada “Xan qızı”nın həyat və yaradıcılığı, onun poeziya ustadı, dövlət xadimi, ana kimi dolğun obrazı öz əksini tapmışdır. Əsər Natəvanın bu gün də bizimlə birgə olması, Qarabağdan nigarançılıq çəkməsi və operanın sonunda “Şuşanı xilas edin!” sözləri ilə xalqa müraciət etməsi ideyası üzərində qurulmuşdur.
Üç pərdəli operanın quruluşçu rejissoru Azərbaycan və Özbəkistan respublikalarının xalq artisti Firudin Səfərov, quruluşçu rəssam xalq rəssamı Rafiq İsmayılov, baletmeyster xalq artisti, Dövlət mükafatı laureatı Tamella Şirəliyeva, dirijor Yalçın Adıgözəlovdur. Əsərin librettosunu Nazim İbrahimov, şerləri Rüzgar Əfəndiyeva yazmışlar. Eyni zamanda librettoda Natəvanın, Qasım bəy Zakirin və “Məclisi-Üns” ədəbi məclisi üzvlərinin şerlərindən də istifadə olunmuşdur.
Tamaşada Natəvan rolu xalq artistləri Xuraman Qasımovaya və Qənirə Kərimovaya, Xasay Xan Usmiyev rolu Azər Zeynalova həvalə edilmişdir. Xalq artistləri Arif Babayev Mirzə Fəna, Canəli Əkbərov Mirzə Həsən Yüzbaşov, əməkdar artistlər Elxan Əhədzadə Aleksandr Düma, Şahlar Quliyev Qasım bəy Zakir, Səfa Qəhrəmanov Mirzə Növrəs rollarını ifa edəcəklər. Digər rollarda isə xalq artisti Səkinə İsmayılova, əməkdar artistlər Nəzakət Teymurova, Əkrəm Poladov, Mənsum İbrahimov və başqaları oynayacaqlar.
Operanın məşqlərinə bu ilin aprel ayında başlanılacaqdır. Əsərin premyerası may ayında olacaqdır.
Bölmənin digər xəbərləri
