NATO-NUN BAŞ KATİBİ YAAP DE HOOP SXEFFERİN BƏYANATI
Mən, səfirlər və Şimali Atlantika Şurası Azərbaycan Prezidenti cənab İlham Əliyevi burada bir daha salamlamaqdan olduqca məmnunuq. Fikrimcə, onun səfəri bir sıra səbəblərə görə böyük əhəmiyyət kəsb edir.
İlk növbədə, onu deməliyəm ki, NATO üzrə müttəfiqlər Azərbaycan ilə müxtəlif aspektlərdə əməkdaşlığı yüksək qiymətləndirirlər. Bildiyiniz kimi, “Fərdi tərəfdaşlığın fəaliyyət planı” mövcuddur. Biz müdafiə islahatları, təsisat dəyişiklikləri kimi məsələlər üzərində birgə işləyirik. Həmin məsələlər ətrafında geniş fikir mübadiləsi aparıldı. Azərbaycanda iqtisadi inkişaf, güclü siyasi sistemin qurulması, demokratikləşmə, mətbuat azadlığı və sair sahələrə aid Prezidentin verdiyi məlumatlar nəzərə alındı. Burada aydınlıq var.
Prezident Əliyevin bu gün səhər buraya gəlməsinin ikinci səbəbi də var. Bu, Azərbaycanın regiondakı mühüm mövqeyi və rolu ilə bağlıdır. Region həssasdır, orada qeyri-sabitlik riskləri var. Onu da qeyd edim ki, qonağımız böyük həcmdə karbohidrogenlər ixrac edən ölkənin başçısıdır. Bu amil təkcə iqtisadiyyatla yox, həm də strategiya və geosiyasətlə bağlıdır. Prezident olduqca maraqlı çıxış etdi. Həmin məsələlər ətrafında maraqlı müzakirələrimiz oldu.
Bir sözlə, vaxtınızı çox almaq istəmirəm. Cənab Prezident, Sizin səfəriniz, danışıqlarda səmimiliyiniz yüksək qiymətləndirilir. Artıq dediyim kimi, biz çox geniş məsələləri müzakirə etdik. Hesab edirəm ki, Prezident Əliyevin səfəri Azərbaycan-NATO münasibətlərinin daha da intensivləşdirilməsinə xidmət edəcəkdir. Biz “Fərdi tərəfdaşlığın fəaliyyət planı” üzərində işləyirik. Azərbaycan fəal çalışır. Beləliklə, cənab Prezident, Sizi burada görməyimizdən çox məmnunuq.
Üzr istəyirəm, icazənizlə, mən əlavə edim. Bu məsələni yaddan çıxarmaq istəmirəm, yoxsa, səhv buraxmış olaram. Azərbaycanın Əfqanıstan və Kosovodakı kimi vacib əməliyyatlarda iştirakı NATO və onun tərəfdaşları üçün böyük əhəmiyyət kəsb edir. Mən bunu yaddan çıxara bilmərəm, çünki bu addım Azərbaycanı təhlükəsizliyin vacib təminatçısına çevirir. Bir halda ki, təşkilatımız bu gün bir çox yerlərdə əməliyyatlar aparır, bu məsələ NATO çərçivəsində çox mühümdür. Üzr istəyirəm, cənab Prezident, mən bunu yaddan çıxara bilməzdim.
Bölmənin digər xəbərləri
