“Naxçıvan Muxtar Respublikasında qadınların iqtisadi səlahiyyətlərinin artırılması” layihəsinin icrasına başlanılıb
Naxçıvan, 19 may, AZƏRTAC
Amerika Birləşmiş Ştatlarının Azərbaycandakı səfirliyinin maliyyələşdirdiyi, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və Azərbaycan Mikromaliyyə Assosiasiyası tərəfindən icra olunan “İcma quruculuğu təşəbbüsləri proqramı” çərçivəsində “Naxçıvan Muxtar Respublikasında Qadınların İqtisadi Səlahiyyətlərinin Artırılması” adlı layihənin icrası ilə əlaqədar tədbir olub.
Muxtar respublikanın Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, tədbirdə çıxış edən komitənin sədri Ramilə Seyidova Naxçıvan Muxtar Respublikasında dövlət qadın siyasətinin uğurlu nəticələri barədə danışıb. Bildirib ki, dövlət qadın siyasətinin tərkibi olan qadınların sağlamlıqlarının və hüquqlarının qorunması, təhsili, məşğulluqlarının təmin olunması, mikro və makro sahibkar kimi fəaliyyət göstərmələri, onların peşə kurslarına cəlb olunması, ümumən, qadınların muxtar respublikanın ictimai-siyasi və sosial-mədəni sahələrdə iştiraklarının artırılması ilə əlaqədar məqsədyönlü tədbirlər həyata keçirilir, müvafiq sahədə qanunvericilik aktları, Dövlət proqramları qəbul olunur. Göstərilən qayğının nəticəsində Naxçıvan qadınları bütün sahələrdə, xüsusən də özəl sektorda geniş təmsil olunurlar.
Bu gün muxtar respublikada fəal əməklə məşğul olan və iqtisadiyyatın müxtəlif sahələrində işləyən əhalinin 33 faizini qadınlar təşkil etdiyini bildirən komitə sədri qeyd edib ki, aparılan sosialyönümlü tədbirlərin davamı olaraq Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən qadınların rifah halının yaxşılaşdırılması və məşğulluğunun artırılması məqsədilə 2021-ci ilin ötən dövrü ərzində 55 aztəminatlı və məhdud fiziki imkanlı qadınlar üçün toxuculuq peşəsinin öyrədilməsi ilə bağlı təlim keçirilib, qadınların özünüməşğulluqlarının təmin edilməsi məqsədilə məhdud fiziki imkanlıların və istedadlı qadınların rəsm və əl işlərindən ibarət sərgi-satışlar təşkil olunub. Həmçinin muxtar respublikada qadınların sahibkarlıq fəaliyyəti ilə məşğul olması, kredit resurslarından, bazar və müxtəlif imkanlardan istifadəsi üçün hər cür şərait yaradılıb. Hazırda muxtar respublikada, ümumilikdə, 7390 qadın sahibkarlıq fəaliyyəti ilə məşğuldur.
Diqqətə çatdırılıb ki, icrası başa çatan və müvəffəqiyyətlə icra olunan Avropa İttifaqının maliyyələşdirdiyi BMT-nin İnkişaf Proqramının qismən maliyyə dəstəyi daxil olmaqla Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və Azərbaycan Mikromaliyyə Assosiasiyası tərəfindən icra etdiyi “Qadınların dayanıqlı inkişaf üçün səlahiyyətləndirilməsi” layihəsi çərçivəsində öz biznes planı ilə fərqlənən 102 qadına 69 min 250 manat məbləğində sərmayə kapitalı verilib. Bu da muxtar respublikada ailə təsərrüfatlarının inkişafına, onların ailə və bizneslərində maliyyə idarəetməsi üzrə bilik və bacarıqlarının artırılmasına təkan verməklə yanaşı, həm də yeni ailə təsərrüfatlarının formalaşmasına şərait yaradıb. Hazırda muxtar respublikamızda 1040 ailə təsərrüfatı fəaliyyət göstərir.
Ramilə Seyidova bildirib ki, görülən işlərin davamı olaraq cari ildə “Naxçıvan Muxtar Respublikasında qadınların iqtisadi səlahiyyətlərinin artırılması” adlı layihənin icrasına başlanılıb. Layihə çərçivəsində “Gələcəyini planlaşdır” və “Sahibkar ol!” təlimlərinin keçirilməsi nəzərdə tutulub. Təlimlərin keçirilməsinin məqsədi layihə iştirakçıları olan qadınların maliyyə savadlılığının və idarəetmə vərdişlərinin yüksəldilməsinə, eyni zamanda gəlir mənbələri qismən məhdud olan qadınların, xüsusən də sağlamlıq imkanları məhdud qadınların sahibkarlıq fəaliyyətinin təşviq edilməsinə xidmət edir. Təlimlər zamanı sağlamlıq imkanları məhdud və aztəminatlı ailələrdən olan qadınlar da daxil olmaqla, muxtar respublikanın Şərur, Babək, Ordubad, Culfa, Şahbuz, Kəngərli, Sədərək rayonlarından və Naxçıvan şəhərindən olan 27 qadının iştirakı nəzərdə tutulub. Təlimlərin sonunda uğurlu biznes planı təqdim edən layihə iştirakçılarına sertifikatlar təqdim olunacaq və 20 qadına sərmayə kapitalı veriləcək. Komitə sədri muxtar respublika qadınlarına göstərdiyi diqqət, qayğı və dəstəyə görə Naxçıvan Muxtar Respublikası Ali Məclisin Sədri Vasif Talıbova minnətdarlığını bildirib.
Azərbaycan Mikromaliyyə Assosiasiyasının layihə rəhbəri Sevinc Rüstəmova layihə haqqında ətraflı məlumat verib. O, layihə çərçivəsində keçiriləcək təlimlərin qadınların maliyyə savadlılığı ilə bağlı bilik və bacarıqlarının atmasına, onların gələcək bizneslərinin inkişafına əhəmiyyətli təsir göstərəcəyinə əminliyini bildirib.
Layihə iştirakçıları Rəfayə İbrahimova, Reyhan Salmanova onlara göstərilən diqqət və qayğıya görə dövlətimizə minnətdarlıqlarını bildiriblər.
Sonra layihə rəhbəri Sevinc Rüstəmova maliyyə savadlılığı üzrə “Gələcəyini planlaşdır” təliminə start verib. Təlimdə qadınlara pul vəsaitlərinin idarə olunması, büdcə planlaşdırılması, borc idarəetmə üsulları, mövsümi xərclərin idarəedilməsi, qənaət vərdişləri və digər bacarıqlarla bağlı məlumat verib.
Qadınların maraqla qarşıladığı təlim qarşılıqlı müzakirə şəraitində keçirilib.
Bölmənin digər xəbərləri
