“Naxçıvan” Universitetində keçirilən konfrans İslamda mənəvi dəyərlər mövzusuna həsr edilib
Naxçıvan, 20 may, AZƏRTAC
Azərbaycançılıq məfkurəsində dini dəyərlərin mühüm yeri və əhəmiyyəti var. İslam dini dəyərləri azərbaycanlıların mənəvi varlığının ayrılmaz tərkib hissəsinə çevrilib, türk-islam mədəniyyəti isə əsrlər boyu ölkəmizin inkişafına təsir edən amil olub.
AZƏRTAC-ın Naxçıvan bürosu xəbər verir ki, “Naxçıvan” Universitetində keçirilən konfransda bu sözləri ali təhsil ocağının rektoru Nurlana Əliyeva deyib.
Rektor qeyd edib ki, Azərbaycan müstəqillik qazandıqdan sonra uzun illər ciddi təzyiqlərə məruz qalan milli ideologiyada azərbaycançılıqla yanaşı, islami dəyərlər də bərpa olundu. Ulu Öndərin sayəsində Azərbaycan Respublikası milli ideologiyada İslamla bağlı məqamları qoruyub saxladı, azərbaycançılıq dövlət ideologiyası səviyyəsinə yüksəldi.
Konfransda universitetin İlahiyyat kafedrasının müdiri Xəfayət Əliyeva və Naxçıvan Muxtar Respublikası Qazısı yanında Şuranın sədri Sahib Məmmədov mövzu ilə bağlı çıxışlarında bildiriblər ki, İslamın maddi və mənəvi təmizliyə verdiyi əhəmiyyəti başqa heç bir din və sistemdə görmək mümkün deyil. İslam dini-mənəvi dəyərləri əsrlər boyu insanları müqəddəs əxlaq normaları ilə tərbiyələndirib. İslam dini, sözün əsl mənasında, təmizlik dinidir.
Konfransın sonunda iştirakçıların sualları cavablandırılıb.
Bölmənin digər xəbərləri
